Өзбекстан Республикасы Президенти Шавкат Мирзиёев Түркий дүнья жазыўшылары, зиялылары ҳәм көркем өнер ғайраткерлери қоры (Türk Dünyası Yazarlar ve Sanatçılar Vakfı –TURKSAV) тәрепинен шөлкемлестирилген «Түркий дүньяның тиклениўине қосқан үлкен үлеси ушын» халықаралық сыйлығына ийе болды.

Бул ҳаққында ТҮРКСАВтың Анкарада өткерилген арнаўлы баспасөз конференциясында мәлим етилди.

Сыйлық ийесиниң исми-фамилиясы ТҮРКСАВтың коллегиаллық комитети тәрепинен Түркия ҳәм сырт мәмлекетлердиң белгили сиясатшылары, экономистлери, илим ҳәм көркем өнер ғайраткерлериниң 2019-жылдағы жумысын үйрениў нәтийжелери тийкарында жәрияланды.

ТҮРКСАВ сыйлығын тапсырыў мәресими 2020-жыл май айында Анкарада Түркия парламенти, ҳүкимети, кең жәмийетшилиги, исбилерменлик топарлар ҳәм көркем өнер ғайраткерлериниң қатнасыўында салтанатлы түрде өткерилиўи режелестирилген.

Сыйлыққа түрли жылларда Түркияның Президенти С.Демирел, Әзербайжанның Президенти Г.Алиев, Қазақстанның Президенти Н.Назарбаев ҳәм басқалар ийе болған.

Дерек: Қарақалпақстан хабар агентлиги