Ҳәзирги ўақытта мәмлекетимизде дийқан-фермерлер ҳәм  қыйтақ  жер  ийелери жерден үнемли пайдаланыў мақсетинде егис, сондай-ақ, теплица ҳәм парниклерде өним жетистириў жумысларын жедел түрде алып бармақта. Бул  процесслерде  жетистирилип  атырған өнимлерди зыянлы организмлерден қорғаў үлкен әҳмийетке ийе.

Қарақалпақстан Республикасы өсимликлер карантини аймақлық  инспекциясының мағлыўматларына қарағанда, агроном-инспекторлар тәрепинен ҳәзирги күнде мийўе бағларындағы ҳәм теплицалардағы зыянлы организмлерди анықлаў ҳәм олардың тарқалыўының алдын алыў мақсетинде  феромон тутқыш қойыў жумыслары алып барылмақта.

– Усы   күнге  шекем  республикамыздың  қала   ҳәм   районларындағы  агроном-инспекторлар тәрепинен алма мийўехоры, картошка күйеси, помидор күйеси, шығыс мийўехоры, амбор күйеси, шийе мийўехоры зыянкеслерине қарсы 288 дана феромон тутқышлар қойылды,-дейди инспекцияның ишки карантин бойынша жетекши агрономы Улуғбек Жумамуратов. – Бул   феромон  тутқышларды  қойыўдан мақсет – теплица ҳәм парниклерде зыянкеслердиң бар яки жоқ екенлигин анықлаў, ушырасқан жағдайда олардың көбейип, тарқалыўының алдын алыў болып есапланады.

– Ҳәзирги  күнде биз  агроном-инспекторлар аймақларымыздағы барлық мийўе  бағларын,  сондай-ақ,  қоймаханаларды  карантин  тексериўинен өткериў жумысларын алып бармақтамыз, -дейди Беруний районы  өсимликлер  карантини  агроном-инспекторы Музаффар Нуриев. – Аўыл хожалығы  өнимлери сақланатуғын қоймаханаларға 1-2 данадан «амбор күйеси» феромон  тутқышы  орнатылып, ҳәр үш күннен бақлаўдан  өткерилип барылмақта. Ал,  бағларда мийўе ағашларының гүллеў дәўиринде гектарына 1 данадан, шақаларына  1,5-2 метр бийикликте «шарқ мийўехоры» зыянкесине қарсы  феромон  тутқышлар  орнатылып,  оларды   қадағалап   бармақтамыз.

Өсимликлер   карантини  тараўында  алып  барылып  атырған  бундай жумыслар мәмлекетимизде азық-аўқат өнимлери қәўипсизлигин  тәмийинлеўге, сондай-ақ, сапалы аўыл хожалығы өнимлерин  жетистириўге   қаратылғанлығы  менен  әҳмийетли.