Онда Олий Мажлис Нызамшылық палатасының депутатлары ҳәм Сенатының ағзалары, ҳүкимет ағзалары, сиясий партиялар ҳәм жәмийетлик шөлкемлердиң ўәкиллери қатнасты. Видеоконференция байланысы арқалы мәжилисте Қарақалпақстан Республикасы Жоқарғы Кеңеси, халық депутатлары ўәлаятлық, Ташкент қалалық, районлық ҳәм қалалық кеңеслери ағзалары, жергиликли атқарыўшы уйымлардың басшылары, жәмийетшилик ўәкиллери қатнасты.

Мәжилисте Өзбекистан Республикасы Президенти Шавкат Мирзиёев шығып сөйледи.

Елимизде жәмийетлик турмыстың барлық тараўларын еле де еркинлестириў ҳәм реформалаў процесслери избе-из даўам етпекте. Қайсы сала ямаса тармақта болмасын, әҳмийетли машқалалар халық пенен ашық додаланып, олардың шешими табылмақта.

Мәжилисте ерисилген табыслар атап өтилген ҳалда, хәкимияттың ўәкиллик уйымлары, сиясий партиялар ҳәм Экологиялық ҳәрекеттиң өткен дәўирдеги жумысы сын көз-қарастан талқыланды, реформаларды еле де тереңлестириў жолындағы әҳмийетли ўазыйпалар белгилеп берилди.

Парламент ағзалары, сиясий партиялардың ўәкиллери көрсетилип атырған айрықша итибар ушын мәмлекетимиз басшысына миннетдаршылық билдирип, мәжилисте ҳәр тәреплеме терең тийкарлап берилген әҳмийетли ўазыйпаларды әмелге асырыў бойынша өз-ара биргеликте нәтийжели жумыс алып барыў ҳәм белгиленген мақсетлерге ерисиў депутатлық корпусының оғада жуапкершиликли ҳәм абыройлы ўазыйпасы екенлигин атап өтти.