Gimnastika boʻyicha Respublika ixtisoslashtirilgan olimpiya zaxiralari bolalar-oʻsmirlar sport maktabida Markaziy Osiyo qilichbozlik konfederatsiyasining oʻsmirlar va kadetlar oʻrtasida I ochiq chempionati oʻtkazildi.

Oʻzbekiston Jismoniy tarbiya va sport vazirligi, Milliy olimpiya qoʻmitasi, Milliy axborot agentligi, Milliy teleradiokompaniya hamda mamlakatimiz qilichbozlik federatsiyasi hamkorligida ilk marotaba oʻtkazilgan mazkur musobaqada hamyurtlarimizdan tashqari qoʻshni Afgʻoniston, Tojikiston, Turkmaniston, Qirgʻiziston va Qozogʻistondan kelgan 150 nafardan ortiq sportchi gʻoliblik uchun kuch sinashdi.

Chempionatda umidli qilichbozimiz Zaynab Dayibekova qilich yoʻnalishida kadetlar va oʻsmirlar oʻrtasida barcha raqiblarini yengib, terma jamoamiz hisobiga ikkita oltin medalni qoʻshib qoʻydi.
Shamshir, qilich va rapira yoʻnalishlarida oʻtgan bellashuvlarda oʻsmirlar oʻrtasida Sanjarbek Sobirov, Ahmadilloxon Solihojiyev, Pazilbek Genjeboyev, Jasmina Suvonova kabi sportchilarimiz shohsupaning eng yuqori pogʻonasiga koʻtarilgan boʻlsa, kadetlarimizdan Sherzod Mamutov, Ilyos Molina, Shahzoda Egamberdiyeva, Lolita Ziyoxoʻjayeva hamda Marjona Usmonova oltin medal bilan taqdirlandi.

Oʻzbekiston terma jamoasi Markaziy Osiyo qilichbozlik konfederatsiyasining oʻsmirlar va kadetlar oʻrtasidagi I ochiq chempionatida 11 ta oltin, 9 ta kumush va 16 ta bronza, jami 36 ta medalni qoʻlga kiritgan holda umumjamoa hisobida birinchi oʻrinni egalladi.

Shuningdek, Turkmaniston terma jamoasi yagona oltin medal bilan ikkinchi, Qozogʻiston vakillari 2 ta kumush va 7 ta bronza bilan umumjamoa hisobida uchinchi boʻlishdi.

JavohirToshxoʻjayev, Muhammad Amin (surat), OʻzA