2019-yilning 16-yanvar kuni Madrid shahrida Oʻzbekiston Respublikasi Favqulodda va Muxtor Elchisi etib tayinlangan Jahongir Ganiyevning Ispaniya Qiroli Filipp VI ga ishonch yorliqlarini topshirish rasmiy marosimi boʻlib oʻtdi.

Tantanali marosimdan soʻng boʻlib oʻtgan suhbat chogʻida Oʻzbekiston-Ispaniya munosabatlarining dolzarb jihatlari muhokama qilindi.

Ispaniya Qiroli yuqori darajadagi oʻzaro ishonch, ikki tomonlama va xalqaro kun tartibidagi muhim masalalar boʻyicha mavqelar oʻxshash va yaqinligiga yuksak baho berdi.

Ispaniya Qiroli Ostona shahrida “EXPO-2017” xalqaro koʻrgazmasi doirasida boʻlib oʻtgan Oʻzbekiston Prezidenti bilan uchrashuvini alohida qayd etdi, ushbu uchrashuvda mamlakatlarimiz oʻrtasidagi koʻp qirrali hamkorlikni yanada kengaytirish va chuqurlashtirish yoʻllari belgilangan edi.

Muloqot yakunida Ispaniya Qiroli Oʻzbekiston Prezidenti Shavkat Mirziyoyevga hurmat-ehtiromini izhor etib, unga oʻzining samimiy tilaklarini yetkazishni soʻradi.