Ushbu seminar O‘zbekiston Respublikasi Fanlar akademiyasi tomonidan tashkil etildi.

O‘zbekiston Respublikasi Fanlar akademiyasi prezidenti B.Yo‘ldoshev va boshqalar mamlakatimizda ta’lim sohasida amalga oshirilayotgan keng ko‘lamli islohotlar ijtimoiy-iqtisodiy taraqqiyotda ilm-fanning o‘rnini yanada mustahkamlash, akademiklar faoliyatini har tomonlama qo‘llab-quvvatlash, yuqori malakali ilmiy kadrlar tayyorlashga alohida e’tibor qaratilayotganini ta’kidladi. 

Prezidentimiz Shavkat Mirziyoyevning 2016-yil 29-dekabrdagi «O‘zbekiston Respublikasi Fanlar akademiyasining akademiklari faoliyatini yanada takomillashtirish va rag‘batlantirish chora-tadbirlari to‘g‘risida»gi farmoni bu boradagi ishlar ko‘lamini yanada kengaytirishga xizmat qilmoqda. 

Mamlakatimiz ilm-fani oldiga qo‘yilgan dolzarb vazifalarning amalga oshirilishi ilmiy tadqiqotlar yetakchi markazi va innovatsion g‘oyalar ijodkori sifatida Fanlar akademiyasi faoliyatini tubdan isloh etishni ko‘zda tutadi. Bu esa akademik ilm-fanni yangi ijtimoiy-iqtisodiy sharoitlarga moslashtirish, iqtisodiyotimiz ehtiyojlariga mos va jahon bozorida munosib raqobatlasha oladigan mahsulotlar ishlab chiqarish uchun shart-sharoitlar yaratish, innovatsion fikrlash qobiliyatiga ega yangi avlod ilmiy kadrlarini tayyorlashni taqozo etadi. 

O‘zbekiston Respublikasi Fanlar akademiyasi olimlari tomonidan yaratilgan yangi materiallar va nanotexnologiyalarga oid ilmiy tadqiqotlar, ishlanmalar agrar soha, tibbiyot, farmakologiya, poligrafiya, yengil sanoat va to‘qimachilik, avtomobilsozlik, ishlab chiqarish, elektronika, biologiya, tibbiyot, energetika, materialshunoslik va boshqa sohalarda keng qo‘llanilmoqda. 

Seminarda fan, ta’lim va ishlab chiqarish integratsiyasini yanada takomillashtirish uchun yangi texnologiyalarni joriy qilishda jahonning yetakchi institutlari, universitetlari, ilmiy markazlari va Fanlar akademiyalari bilan ilmiy hamkorlikni yanada rivojlantirish, yosh olimlarning ilmiy ishlanmalarini qo‘llab-quvvatlash, innovatsion ishlanmalarni amaliyotga kengroq joriy etish va boshqa masalalar muhokama etildi.