Навоий вилоятида ҳам бугун эрта тонгдан овоз бериш жараёни уюшқоқлик билан бошланди.

Ўзбекистон Республикаси Президенти сайловини ўтказиш учун вилоятда 363 участка сайлов комиссияси тузилган. Барча туман ва шаҳарлардаги сайлов участкалари эрта тонгдан сайловчилар билан гавжум. 

Навоий шаҳридаги 12-сайлов участкасида овоз бериш жараёни қизғин паллада. 2 минг 651 сайловчи рўйхатга олинган участка ҳудудида турли миллат вакиллари аҳил-иноқ яшамоқда. 

–Конституциявий ҳуқуқимдан фойдаланиб, муносиб номзод учун овоз бердим, – дейди Юлия Аллаева. – Сайлов участкасида барча шароитлар яратилган. Миллатим украин бўлса-да, Ватаним Ўзбекистон! Бу ерда мен ва оила аъзоларим ўз фуқаролик ҳуқуқидан тўла фойдаланиши, истеъдод ва салоҳиятини намоён этиши учун барча шароит ва имкониятлар мавжуд. Мамлакатимизда 130 дан зиёд миллат ва элат вакиллари аҳил-иноқ яшамоқда ва уларга ўз маданияти, тили, миллий урф-одатларини асраб-авайлаш, ривожлантириш учун барча шароит яратилган. Тинчлик, хотиржамлик, бағрикенглик, меҳр-оқибат ва қадриятлар устувор мамлакатда яшаётганимдан фахрланаман. Бугун шу азиз Ватаним келажаги учун овоз бердим. 

Манба: ЎзА