Тошкентнинг "Локомотив" жамоаси муддатидан олдин мамлакат чемпионлигини қўлга киритди

Футбол бўйича Ўзбекистон миллий чемпионати олий лигасида мамлакатимизнинг ўн олти жамоаси ўзаро баҳслашмоқда. Олий лига баҳслари якунланишига бир тур қолганда "Локомотив" жамоаси 68 очко билан олтин медални нақд қилиб қўйди. 

Йигирма тўққизинчи тур доирасида "Локомотив"нинг энг яқин таъқибчиси "Бунёдкор" жамоаси ўз майдонида "Навбаҳор" клубини қабул қилиб, 1:1 ҳисобида дуранг ўйнади ва очколар сонини 63 тага етказди. 

"Локомотив" эса қолган учрашувларда қандай натижа қайд этишидан қатъий назар ўз тарихида илк марта мамлакат чемпионига айланди. 2002 йилда ташкил этилган «Локомотив» клуби Ўзбекистон чемпионатида уч марта кумуш ва бир марта бронза медалини қўлга киритган. 

Йигирма тўққизинчи тур доирасида "Машъал" жамоаси "Бухоро"ни 2:0 ҳисобида мағлубиятга учратган бўлса, "Нефтчи" ўз майдонида "Қизилқум"га 0:1 ҳисобида имкониятни бой берди. "Обод" ва "Андижон" жамоалари ўртасидаги баҳсда ҳисоб очилмади. 

Манба: ЎзА