2023 йил 19 январь куни Ўзбекистон Республикаси Ташқи ишлар вазири в.б. Бахтиёр Саидов мамлакатимиздаги дипломатик миссиясини якунлаётган Ўмон Султонлигининг Фавқулодда ва мухтор элчиси Аҳмад ал-Касирийни қабул қилди.

Б.Саидов Элчининг икки томонлама муносабатлар изчил ривожланишига қўшган шахсий ҳиссасини юқори баҳолади.

Элчи Ўзбекистонда ишлаган даврида (2019-2023 йиллар) республиканинг жадал тараққиётига хизмат қилган кенг кўламли ислоҳотларнинг гувоҳи бўлганини таъкидлади.

Учрашувда Ўзбекистон-Ўмон ҳамкорлигининг долзарб масалалари, илгари эришилган келишувлар ижроси ва турли даражадаги бўлажак учрашувлар жадвали муҳокама қилинди.

Савдо-иқтисодий, транспорт-коммуникация, маданий-гуманитар соҳалардаги ҳамкорликнинг мавжуд салоҳиятидан самарали фойдаланиш муҳимлиги қайд этилди.

Элчи Ўзбекистон томонига дипломатик фаолиятини амалга оширишда кўрсатилган ёрдам ва яратилган қулай шарт-шароитлар учун миннатдорлик билдирди.

Манба: Ўзбекистон Республикаси Ташқи ишлар вазирлиги