Жорий йилнинг 28 декабрь куни Ўзбекистон Республикаси Бош вазирининг ўринбосари – инвестициялар ва ташқи савдо вазири Жамшид Ходжаев раислигида Жаҳон савдо ташкилоти (ЖСТ) билан ишлаш бўйича Идоралараро комиссиянинг навбатдаги йиғилиши бўлиб ўтди.

Йиғилишда 2022 йилда амалга оширилган ишлар якунлари сарҳисоб қилинди ва жалб қилинган вазирлик ва идоралар кесимида ЖСТга аъзо бўлиш доирасида 2023 йилга мўлжалланган асосий вазифалар белгилаб олинди. Ўзбекистон Республикаси Президентининг Олий Мажлисга ва Ўзбекистон халқига мурожаатида белгиланганидек, Ташкилотга аъзо бўлиш бўйича барча асосий музокараларни 2023 йил охиригача якунлаш, шунингдек, миллий қонунчиликни ЖСТ қоидалари ва меъёрларига мувофиқлаштириш ва янги стандартларни жорий этиш бўйича ишларни жадаллаштиришга доир комплекс чора-тадбирларни кўриш муҳимлиги. алоҳида таъкидланди.

Учрашув давомида республиканинг ЖСТга аъзо бўлишининг ҳозирги ҳолати ва Ўзбекистоннинг Ташкилотга аъзо бўлиши бўйича Ишчи гуруҳнинг 6-йиғилишини ташкил этишга тайёргарлик кўриш масалалари ҳам муҳокама қилинди. Маълум қилинишича, ҳозирга қадар ЖСТга аъзо давлатлар режалаштирилган музокараларни ташкил этиш учун барча зарур ҳужжатларни олган. Бундан ташқари, ЖСТга аъзо давлатлар ва Ташкилот Котибияти билан аввал эришилган келишувларни ўз вақтида амалга ошириш юзасидан икки томонлама музокаралар ва маслаҳатлашувлар ўтказилмоқда.

Таҳлил натижаларига кўра, Идоралараро комиссия аъзоларига Ишчи гуруҳнинг 6-йиғилишига ҳар томонлама тайёргарлик кўриш, барча топшириқларнинг ўз вақтида бажарилишини таъминлаш ва тайёрланаётган ҳужжатлар сифатини ошириш юзасидан аниқ топшириқлар берилди. Шунингдек, тегишли вазирлик ва идоралар раҳбарларига барча зарур ҳужжатларни тайёрлаш ва ЖСТга аъзо давлатлар билан аниқ муддатларда икки томонлама музокараларни якунлаш бўйича индивидуал режалар ишлаб чиқиш топширилди.

Йиғилиш якунлари бўйича Ўзбекистоннинг ЖСТга аъзо бўлиши бўйича Ишчи гуруҳ йиғилишларини ва Ташкилотга аъзо давлатлар билан икки томонлама музокараларни ўз вақтида ташкил этиш бўйича ишларни мувофиқлаштириш мақсадида тегишли вазирлик ва идоралар раҳбарлари иштирокида мунтазам равишда йиғилиш ва муҳокамаларни ўтказиш бўйича топшириқ берилди.

Манба: Ўзбекистон Республикаси инвестициялар, саноат ва савдо вазирлиги