Инновацион ривожланиш вазирлиги ва Инновацион соғлиқни сақлаш миллий палатаси ўртасида Ҳамкорлик меморандуми имзоланди. Ҳужжатни инновацион ривожланиш вазири Иброҳим Абдураҳмонов ва Инновацион соғлиқни сақлаш миллий палата раиси Миразим Мирталипов имзолади. 

Ҳамкорлик меморандуми Соғлиқни сақлаш вазирлиги тизимидаги олий таълим муассасалари, илмий ташкилотлар ва ихтисослаштирилган илмий-амалий тиббиёт марказларидаги тадқиқотчиларнинг илмий ва инновацион фаолиятини қўллаб-қувватлаш мақсадида имзоланди. Унга кўра ҳамкорликда янги истиқболли илмий-инновацион лойиҳаларни ишлаб чиқиш ҳам кўзда тутилган. 

Аҳолига тиббий ёрдам кўрсатиш сифатини ошириш, cоғлиқни сақлаш тизимига оид мавжуд муаммоларни аниқлаш, уларнинг илмий ечимини таъминлашда лойиҳалар ва чора-тадбирларни ҳамкорликда амалга ошириш ҳамда рационализаторлик фаолиятини ривожлантиришда зарур шарт-шароитларни яратиш бўйича ҳам биргаликда иш олиб боришига келишилди.

Манба: Ўзбекистон Республикаси Инновацион ривожланиш агентлиги