3 октябрь куни Будапешт шаҳрида бўлиб ўтган Ўзбекистон-Венгрия бизнес форуми доирасида Ўзбекистон Республикаси Инновацион ривожланиш вазирлиги ва Венгриянинг "MARTON GENETICS" ўртасида ўсимликлар навларини тадқиқ этиш ва сақлашга қаратилган ҳамкорлик меморандуми имзоланди.

Меморандумни инновацион ривожланиш вазири Иброҳим Абдураҳмонов ва "MARTON GENETICS" компаниялар гуруҳи ижрочи директори Андраш Шандорфи имзоладилар.

Меморандум қишлоқ хўжалиги ишлаб чиқаришида ишлатиладиган янги ўсимлик навларини (буғдой, тритикале, арпа, колза, нўхат, маккажўхори ва бошқа экинларни) синовдан ўтказиш билан боғлиқ соҳаларда ўзаро манфаатли ҳамкорликни ривожлантириш ва мустаҳкамлаш мақсадида тузилди. Ҳамкор томонлар инновацион технологияларни кенг жорий этиш орқали Ўзбекистонда маккажўхори ва бошқа ҳайдаладиган экинлар уруғчилигини ривожлантириш ҳамда илмий тадқиқот ишларини амалга оширишга келишдилар.

Ҳужжатда биотехнология соҳасида ҳамкорлик қилиш, тажриба алмашиш, биргаликда мутахассисларни тайёрлашни, қўшма илмий-инновацион лойиҳаларни бажариш ҳамда  ҳамда Ўзбекистонда қўшма уруғчилик компаниясини ташкил этиш кўзда тутилган.

Манба: Ўзбекистон Республикаси Инновацион ривожланиш агентлиги