Спортни ривожлантириш вазирлиги, Миллий Олимпия қўмитаси ва унинг қошидаги Республика спорт тиббиёти илмий-амалий маркази (РСТИАМ), спорт федерация ва ассоциациялари мутасаддилари иштирокида онлайн йиғилиш бўлиб ўтди. ZOOM платформасида ўтган тадбирда терма жамоаларимизнинг ҳозирги ҳолати, олдинда турган комплекс мусобақаларга тайёргарлик жараёни муҳокама қилинди.

Унда Спортни ривожлантириш вазирининг ўринбосари Шаҳрулло Маҳмудов, Вазир маслаҳатчиси Аваз Каримов, МОҚ раиси ўринбосари Шерзод Ташматов, РСТИАМ директори Камол Сирожитдинов, федерацияларнинг масъуллари иштирок этишди.

Кун тартибига мувофиқ, дастлаб спортчиларимизни COVID-19 инфекциясига қарши эмлашнинг янги босқичларини ўтказиш масаласи кўриб чиқилди. Бу борада Камол Сирожитдинов ҳозирги кунда авж олаётган коронавирус инфекцияси ҳақида қисқача маълумот бериб ўтди. Шундан сўнг Марказ шифокори Суннатилла Юлчиев терма жамоаларимиз базаларидаги эпидемиологик вазият, ўтган даврда атлетларимизнинг қанчаси коронавирус инфекциясига қарши эмлангани, вируснинг бугунги тарқалиш ҳолати бўйича ҳисобот берди.

Шундан сўнг МОҚ раиси ўринбосари Шерзод Ташматов бир йилга кечиктирилган Конья-2021 V Ислом бирдамлиги ўйинларига тайёргарлик жараёни бўйича гапирди. Шерзод Рихсибаевич ўз нутқида ҳукуматимиз ва халқимиз бўлажак мусобақада спортчиларимиздан улкан натижа кутаётганини инобатга олиб, унга жиддий тайёргарлик олиб бориш лозимлигини алоҳида таъкидлади. Шунингдек, у масъулларга ҳар бир жамоанинг мусобақагача бўлган ўқув-машғулот йиғинларининг режасини яна бир карра кўриб чиқиш, уни такомиллаштириш бўйича ўз тавсияларини берди.

Спортчиларимизни олдинда Россия Федерациясининг Владивосток шаҳрида ўтадиган “Осиё болалари” мусобақаси ҳам кутиб турибди. Бу борада Шаҳрулло Шарипович керакли йўналишлар бўйича маълумот берди. Вазир ўринбосари асосий терма жамоаларимиз учун етишиб чиқаётган ёш атлетларга ҳам катта аҳамият қаратиш зарурлиги, келгусида айнан улар спорт майдонида Янги Ўзбекистоннинг “қалқони” бўлишини урғулади. Қолаверса, у баъзи терма жамоалар олиб бораётган ўқув-машғулот йиғинларининг боришидан кўнгли тўлмаётгани, ошхоналардаги таомлар рационининг атлетлар учун мос келмаётгани, айрим базаларда гигиеник ҳолатнинг талаб даражасида эмаслиги бўйича танқидий фикр билдирди.

Аваз Каримов кун тартибидан ўрин олган сўнгги масала “Олимпия ва Паралимпия спорт турларига тайёрлаш марказларида қабул жараёнига тайёргарлик” мавзусида ҳисобот берди. Вазир маслаҳатчиси унда давлатимиз раҳбарининг жорий йил 23 май куни ушбу мавзу юзасидан ўтказган видеоселектор йиғилишида берган топшириқлари, юклатилган вазифалар ижросини таъминлаш бўйича олиб борилаётган ишлар ҳақида маълум қилди.

Йиғилиш якунида ҳар бир масъуллардан ўз вазифаларига янада жиддий эътибор қаратишлари, ечимини кутаётган масалаларни ҳал қилиш борасида кўрсатма ва топшириқлар берилди.

Манба: Ўзбекистон Миллий Олимпия қўмитаси