Ўзбекистон Республикаси Иннновацион ривожланиш вазирлиги Халқаро рейтинглар билан ишлаш бўлими бошлиғи Бунёд Раҳматуллаев Швейцариянинг Женева шаҳрида Бирлашган Миллатлар Ташкилотининг Европа иқтисодий комиссияси ижрочи котиби ўринбосари Д.Марясин билан учрашди. 

Учрашувда Д.Марясин яқинда эълон қилинган «Ўзбекистоннинг барқарор ривожланиши учун инновациялар» миллий шарҳи ҳақида тўхталиб, тизимда амалга оширилаётган ислоҳотларни юқори баҳолади ва комиссия мамлакатимиз ривожи учун яқиндан ҳамкорлик қилишга тайёрлигини маълум қилди. БМТнинг Марказий Осиё иқтисодиёти бўйича Махсус дастури (SPECA) доирасида барқарор ва самарали инновацион экотизимни шакллантириш, стартапларни қўллаб-қувватлаш, бизнес акцелерация инкубация платформаларини яратиш, илм-фан ва ишлаб чиқариш ўртасидаги ҳамкорликни мустаҳкамлаш ҳамда илмий ишланмалар натижаларини тижоратлаштириш бўйича ҳамкорликни кенгайтириш бўйича келишиб олинди.

Шунингдек,  Б.Раҳматуллаев  Миллатлар Ташкилотининг Савдо ва тараққиёт конференциясининг Илм-фан, технологиялар ва АКТ департаменти раҳбари А. Санц билан учрашув ўтказди. Учрашувда электрон савдо ва транспорт логистикаси илғор инновацион технологияларни жорий қилиш ва ушбу соҳа мутахассисларини малакасини ошириш бўйича ўзаро ҳамкорликни йўлга қўйиш масалалари муҳокама қилинди. 

Музокаралар давомида Савдо ва тараққиёт конференцияси кўмагида электрон савдони ривожлантириш, логистика тизимини такомиллаштириш ва технопаркларни бошқариш бўйича қўшма лойиҳаларни амалга ошириш ва кадрлар малакасини ошириш дастурини йўлга қўйиш бўйича келишувга эришилди.

Манба: Ўзбекистон Республикаси Инновацион ривожланиш агентлиги