2020 йилдан бошлаб ҳар йили иқтидорли ёшларни кашф қилиш ва уларни қўллаб-қувватлашга қаратилган «Мирзо Улуғбек ворислари» республика танлови ўтказиб келинмоқда.

Кеча ушбу танловнинг жорий йилги финал босқичида ғолибликни қўлга киритган креатив ва инновацион ғояга эга иқтидорли ёшларни тақдирлаш маросими бўлиб ўтди. 

Танловнинг финал босқичида республикамизнинг барча ҳудудларидан 16 дан 25 ёшгача бўлган 23 811 нафар иқтидорли ўқувчи ва талаба ёшдан 4526 нафари иштирок этди. 

Бунда ҳар бир иштирокчи танлов учун илмий ва инновацион характерга эга бўлган лойиҳа ва ғояларни тақдим қилди.

Интеллектуал мусобақанинг якуний босқичига жами 280 нафар (шундан, 150 нафари талабалар) иштирокчи етиб келди.

Шундан махсус комиссия хулосасига кўра 100 нафар ғолиб саралаб олинди. Энг қувонарлиси, ғолиблар ичида кўпчиликни талаба-ёшлар ташкил этди.

Тақдирлаш маросимида «Улуғбек» жамғармаси раиси Оқил Салимов, Олий ва ўрта махсус таълим вазири Абдуқодир Тошқулов, Инновацион ривожланиш вазири Иброҳим Абдураҳмонов сўзга чиқиб, танлов иштирокчи ва ғолибларини самимий табрикладилар.

“Шундай миллатлар борки, аждодларидан буюк шахсларни санашга бармоғи етади, аммо ўзбек миллати деган шундай миллат борки, қайси соҳани кўрманг аждодларини санаб саноғига етиб бўлмайди. Бугун Президентимиз ҳам, халқимиз ҳам сиздан илм-фан, кашфиётда учинчи Ренессанс иштирокчилари бўлишингизни кутмоқдалар”, – дея таъкидлади А.Тошқулов.

Манба: Ўзбекистон Республикаси Олий таълим, фан ва инновациялар вазирлиги