Тошкент шаҳрида  Ўзбекистон томони раислигида Шанхай ҳамкорлик ташкилоти (ШҲТ) аъзо-давлатлари Илм-фан ва техника бўйича Доимий ишчи гуруҳнинг йиғилиши бўлиб ўтди. Унда 8 апрель куни бўлиб ўтадиган ШҲТ аъзо-давлатлари Илм-фан ва техника бўйича раҳбарларининг Олтинчи йиғилишида кўриладиган масалалар томонлар ўртасида муҳокама қилинди.

ШҲТ аъзо-давлатлари илм-фан ва техника бўйича раҳбарларининг Олтинчи йиғилишида ШҲТ аъзо-давлатларининг илмий-техника соҳасидаги 2022–2025 йиллардаги ҳамкорлик режаси муҳокама қилинади. Шунингдек, Ўзбекистон томони ташаббуси билан кун тартибига киритилган ШҲТ аъзо-давлатлари ҳамкорлигида сунъий интеллект ривожлантириш Дастури ва бошқа кўплаб масалалар кўриб чиқилади.

ШҲТ аъзо-давлатлари илм-фан ва техника бўйича раҳбарлари йиғилиши 2010 йилдан бери ўтказиб келинмоқда. Мазкур тадбир илмий-техник ва инновацион ҳамкорликни ўрнатиш ва такомиллаштириш учун самарали майдон бўлиб, ШҲТ аъзо-давлатлари ўртасида илм-фан ва техника соҳалари ўзаро манфаатли ришталарининг янада мустаҳкамланишига хизмат қилади.

Манба: Ўзбекистон Республикаси Фанлар Академияси Сейсмология Институти