Экспертлар маҳаллий ижро органлари томонидан маҳсулот ишлаб чиқувчиларга амалий ёрдам кўрсатиш муҳимлигини алоҳида таъкидлашди.

Маълумки, географик кўрсаткич – товарнинг муайян географик объект ҳудудидан келиб чиққан маҳсулот сифатидаги идентификацияловчи белги ҳисобланади. Умуман олганда, географик кўрсаткичлар товарларнинг келиб чиқиш жойи номидан иборат бўлади. Мисол учун, географик кўрсаткичлардан бири бўлган “Рокфор” дейилганда фақат Франциянинг маълум бир вилоятида ишлаб чиқарилган пишлоқ тушунилади.

Чет элдаги географик кўрсаткичларга мисол қилиб, “Swiss” (соатлар), “Feta” (пишлоқ) ва бошқаларни кўрсатиш мумкин. Қўмита экспертлари мамлакатимизда ҳам маълум бир ҳудудга хос маҳсулотлар, айниқса қишлоқ хўжалиги ва ҳунармандчилик соҳасидаги маҳсулотларни оммалаштириш учун катта имкониятлар мавжудлиги, бироқ, товар келиб чиққан жой номларига бўлган қатъий талаблар сабабли минтақавий брендлар етарли даражада ривожланмаганлигини алоҳида қайд этдилар.

Жумладан, Ўзбекистонда бугунги кунда фақат 4 та товар келиб чиққан жой номи рўйхатдан ўтказилган бўлиб, шундан 2 таси маҳаллий ишлаб чиқарувчилар “Bagizagan” (Самарқанд вилояти), “Chortoq” (Наманган вилояти)га тегишли. Йиғилишда маҳаллий тадбиркорлик субъектлари томонидан географик кўрсаткич билан белгиланган маҳсулотларни ишлаб чиқаришни муваффақиятли ривожлантириш мумкинлиги билдирилди.

 

Хусусан, “Чуст пичоғи”, “Марғилон атласи”, “Бухоро гилами”, “Бахмал олмаси”, “Мирзачўл қовуни”, “Самарқанд нони”, “Қашқадарё тандир гўшти” ва бошқа ноёб товарлар географик кўрсаткич сифатида рўйхатдан ўтказилиши мумкин. 

 

Қайд этилганидек, географик кўрсаткич қоида тариқасида ишлаб чиқарилаётган товарни белгилаш учун номи қўлланиладиган мазкур географик объектда жойлашган бир нечта юридик ёки жисмоний шахсларнинг талабномасига биноан рўйхатдан ўтказилиши мумкин. Истисно тариқасида эса, Қонунда бошқа манфаатдор шахслар бўлмаган тақдирда битта юридик ёки жисмоний шахс томонидан рўйхатдан ўтказишга доир талабнома бериш мумкинлиги каби нормалар киритилган. Мажлисда шунингдек, маҳаллий ижро ҳокимияти органлари ва нодавлат нотижорат ташкилот ҳисобланувчи юридик ва жисмоний шахслар бирлашмаларига ҳам географик кўрсаткичларни рўйхатдан ўтказиш ҳуқуқи берилаётгани айтиб ўтилди.