Кеча Тошкент вилоятининг Бекобод шаҳрида “Металлург” футбол клуби қошида фаолият юритадиган “El Golazo Academy Powered by Real Madrid” футбол академиясининг тантанали очилиш маросими бўлиб ўтди. Унда Тошкент вилояти ҳокими Даврон Ҳидоятов, Ўзбекистон футбол ассоциацияси раисининг 1-ўринбосари Равшан Эрматов, “Ўзбекистон металлургия комбинати” АО бошқаруви вакиллари, ўзбек футболи фахрийлари ҳамда “Реал” (Мадрид) футбол клубидан ташриф буюрган нуфузли меҳмонлар, жумладан “қироллик клуби”нинг яқин ўтмишдаги машҳур футболчиси Алваро Арбелоа, академия тарбияланувчилари, мураббийлар штаби ҳамда бекободлик футбол мухлислари иштирок этишди.

“El Golazo Academy Powered by Real Madrid” футбол академиясининг тантанали очилиш маросимига Испаниядан махсус элчи сифатида ташриф буюрган яқин ўтмишдаги машҳур футболчи, жаҳон чемпиони, икки карра Европа чемпиони, УЕФА Чемпионлар лигаси ҳамда УЕФА Суперкубоги ғолиби, клублар ўртасида жаҳон чемпиони, айни пайтда “Реал Мадрид” академиясида U-14 жамоасида бош мураббий бўлиб фаолият юритаётган Альваро Арбелоа сўзга чиқиб, Ўзбекистонга ташрифидан унутилмас таассуротлар олганлиги, “қироллик клуби” анъаналари эндиликда Бекобод шаҳрида – “El Golazo Academy Powered by Real Madrid” футбол академиясида давом эттирилишидан хурсанд эканлигини, бу каби академиялар Осиё қитъасида Ўзбекистондан бошқа мамлакатларда ҳам очилишини жуда исташини айтиб ўтди. Шунингдек, юртимизга кейинги мавсумда “Реал Мадрид” клуби томонидан бошқа ижтимоий тадбирларга яна келиш истаги борлигини ҳам билдирган ҳолда “El Golazo Academy Powered by Real Madrid” футбол академиясининг иш фаолиятига муваффақиятлар тилади.

Тадбирда Ўзбекистон футбол ассоциацияси раисининг биринчи ўринбосари Равшан Эрматов мамлакат футболи тараққиёти йўлида фидойилик кўрсатаётган Тошкент вилояти ҳокимлиги, “Ўзбекистон металлургия комбинати” АО бошқарувига миннатдорлик билдириб, яқин келажакда мазкур академия тарбияланувчилари орасидан машҳур футболчилар етишиб чиқишига ишонч билдирди.

Очилиш маросимидан сўнг тадбирга келган меҳмонлар “El Golazo Academy Powered by Real Madrid” футбол академияси билан таништириб чиқилди. Қисқа фурсатда қуриб фойдаланишга топширилган академия ўқув хоналари, конференция зали, тиббиёт хоналари, хориж тиллари – испан ва инглиз тилларидан чуқурлаштирилган ҳолда таълим берувчи махсус жиҳозлар билан таъминланган синф хоналари, академия тарбияланувчиларининг машғулотларини таҳлил этишга мослашган видео кўрик заллари, 200 нафардан зиёд тарбияланувчига мўлжалланган ётоқхона ва ошхоналар кўздан кечирилди.

Манба: Ўзбекистон Республикаси Туризм ва маданий мерос вазирлиги