“Давлатимиз раҳбари бошчилигида юртимизда маданий, маърифий-маънавий меросни асрашга ҳамда уни ўзимиздан кейинги авлодга муносиб етказиб беришга катта эътибор қаратилмоқда, жумладан музейларимизга бўлган ёндашув тубдан ўзгармоқда. Куни кеча Сергей Бородин уй-музейидаги тадбир, бугунги Абдулла Қодирий хотирасига бағишланган тадбир буларнинг бир дебочаси десак тўғри бўлади. Ўз ўрнида шуни таъкидламоқчиманки, бундан кейин барча адибларимизнинг музейлари, шу жумладан уй-музейларга бўлган эътибор яна-да кучайтирилади”.

 

Шу билан бирга, Азиз Абдуҳакимов Ўзбекистон ҳукумати бебаҳо меросимизни асраш ва бу йўлда ҳаракат қилаётган ёшларни қўллаб-қувватлашга доим тайёр эканини таъкидлади. Жумладан, Қодирий ижодига оид ҳужжатли филм яратилиб, унинг экранларда кенг намойиш этилиши, грантлар ажратилаётган аниматсион филмларда ҳам Қодирий ижодига мурожаат қилиниши ҳақида маълум қилди.

 

Бундан ташқари, Бош вазир ўринбосари Абдулла Қодирий асарларини яна-да кўпроқ тилларга таржима қилиш, адиб ижодини бошқа мамлакатларда ҳам  тарғиб қилиш, соҳага оид илмий-оммабоп асарлар яратишга алоҳида маблағ ажратилишини қўшимча қилди.

 

Маълумот учун: Бундан роппа-роса 83 йил илгари миллатимизнинг бир қатор фидойи маърифатпарварлари, улкан истеъдод соҳиблари, Ватан, эл-юрт равнақи, озодлиги, ободлиги тарафдорлари, раҳнамолари, қалби ва онги уйғоқ, тафаккур тараққиётига чанқоқ жадидлар шафқатсизларча қатл этилган. 1938 йил, 4 октябрь куни Абдулла Қодирий, Абдулҳамид Чўлпон, Абдурауф Фитрат каби эл ардоғидаги шоир ва ёзувчилар, Ғози Олим Юнусов, Қаюм Рамазон, Отажон Ҳошимов, Мажид Қодиров, Зиё Саидов каби адабиётшунос олимлар, биринчи ўзбек кинорежиссёри ва фотографи Худойберган Девонов отувга ҳукм қилинган.

 

Бугун уларни хотирлаб ўтказилган тадбирда ўзбек адабиётининг йирик намояндаларидан бири Абдулла Қодирийнинг ҳаёти ва ижоди алоҳида ёдга олинди. Хотира тадбири доирасида Ўзбекистон давлат драма театри актёрлари томонидан “Жинлар базми” спектаклидан саҳна кўриниши намойиш этилди.