Жорий йилнинг 15 сентябрь куни Халқаро молия корпорацияси (ИФC) бошқарувчи директори Махтар Диопнинг Ўзбекистонга ташрифи доирасида Молия вазирлигида Бош вазир ўринбосари – Иқтисодий тараққиёт ва камбағалликни қисқартириш вазири Жамшид Қўчқоров, Молия вазири Тимур Ишметов ва Энергетика вазири ўринбосари Шерзод Хўжаев ҳамда бир қатор вазирлик ва идоралар, хусусий сектор ва халқаро ташкилотлар вакиллари иштирокида давра суҳбати бўлиб ўтди.

Суҳбат давомида иқлим ўзгариши оқибатларини юмшатиш бўйича лойиҳаларни амалга оширишда хусусий секторни жалб қилишнинг ўрни ва афзалликлари ҳамда Ўзбекистон Республикасининг яшил иқтисодиётга ўтиши ва хусусий секторни иқлимга йўналтирилган лойиҳаларни амалга ошириш ва иқтисодиётни декарбонизация қилиш масалалари муҳокама қилинди. Шунингдек, бошқа мамлакатлар намунасида муваффақиятли амалга оширилган яшил лойиҳаларнинг истиқболлари кўриб чиқилди.

Иқтисодиёти ривожланиб бораётган давлатлар орасида яшил инвестиция бўйича тан олинган лидер сифатида Халқаро молия корпорацияси (ИФC) Ўзбекистон ҳукуматига иқлим ўзгариши лойиҳаларига хусусий инвестицияларни сафарбар этиш бўйича йўл харитасини ишлаб чиқишда ёрдам беришга тайёр эканлигини маълум қилди.

Манба: Ўзбекистон Республикаси Молия вазирлиги