Бугун терма жамоа аъзоларининг “Бунёдкор” футбол академиясида ўтказган машғулотларини Ўзбекистон футбол ассотсиатсияси биринчи витсе-президенти Равшан Эрматов кузатиб борди.

 

Машғулотлар якунида Баҳром Норсафаров бошчилигидаги мураббийлар штаби билан жамоанинг айни пайтдаги ҳолати ва имкониятлари хусусида суҳбатлашилди. Тайёргарлик жараёнига замонавий ёндашиш, янги технологияларни жалб этиш, спорт тиббиётига жиддий эътибор қаратиш зарурлиги таъкидланди. 

 

Шунингдек, футболчиларимизнинг шароитлар ҳақидаги фикрлари тингланди. Эрматов уларга мурожаат қилар экан, аҳиллик, майдонда ва ундан ташқарида бир жамоа эканлигини ҳис этиш, терма жамоа сафида “мен” эмас, балки “биз” деган сўз устувор бўлиши зарурлигини таъкидлаб, агар бунга амал қилинса жаҳон миқиёсида ҳам рақобат қила олишимизни айтиб ўтди. Учрашувда шунингдек Ўзбекистон миллий терма жамоаси бош мураббийи Сречко Катанес ҳам иштирок этди. Словениялик мутахассис халқаро тажрибадан келиб чиқиб ўз тавсиялари билан ўртоқлашди.

 

Тадбир якунида Равшан Эрматов Ўзбекистон футбол ассотсиатсияси президенти Абдусалом Азизов ҳамда кенг футбол жамоатчилиги номидан футболчи қизларимизга омад тилади. Маълумот учун: қизларимиз Осиё кубоги саралаш босқичининг “Е” гуруҳида Жанубий Корея ва Мўғулистон терма жамоаларига қарши баҳс олиб боришади.