Олий Мажлис Сенати раисининг биринчи ўринбосари, Жаҳон иқтисодиёти ва дипломатия университети ректори Содиқ Сафоев бошчилигидаги делегациянинг Буюк Британияга ташрифи доирасида йирик исломшунос олим, Оксфорд ислом тадқиқотлари маркази директори Фархан Низомий билан учрашув бўлиб ўтди.

Фархан Низомий Ўзбекистонда ҳаётга тадбиқ этилаётган кенг қамровли ижтимоий-сиёсий ислоҳотларга юқори баҳо берди. Ўзбекистон раҳбариятининг мамлакатимиз бой маданий-маънавий меросини ўрганиш ва илгари суриш борасидаги саъй-ҳаракатлари алоҳида қайд этилди.

Олимнинг айтишича, яқинда Ислом тараққиёт банки Бошқарувчилар кенгашининг 46-йиллик йиғилиши Тошкентда катта муваффақият билан ўтказилгани Ўзбекистоннинг дунё миқёсидаги обрў-эътибори юксалиб бораётганидан далолат беради.

Оксфорд ислом тадқиқотлари маркази директори маърифий ислом ғояларини тарғиб этиш масалалари бўйича ҳамкорликни янада кенгайтириш, Ўзбекистондаги тадқиқот марказлари билан амалий ҳамкорликни чуқурлаштириш ҳамда Жаҳон иқтисодиёти ва дипломатия университети билан илмий лойиҳаларни биргаликда амалга ошириш юзасидан манфаатдорлик билдирди.

Манба: “Дунё” ахборот агентлиги