Мамлакатимизнинг Ўмондаги элчихонасида ушбу давлатда истиқомат қилаётган ватандошлар билан учрашув бўлиб ўтди.

Иштирокчилар мамлакатимизда  аҳоли фаровонлигини ошириш, ҳудудларни ижтимоий-иқтисодий ривожлантириш борасида амалга ошрилаётган ислоҳотлар билан батафсил таништирилди.

Учрашув чоғида мамлакатимиз Марказий сайлов комиссияси томонидан Ўзбекистон Президенти сайлови кампанияси бошлангани эълон қилингани тўғрисида атрофлича фикр юритилди.

Жорий йил 24 октябрь санаси Ўзбекистон Республикаси Президенти сайлови куни, деб белгилангани қайд этилди. 

Хорижий мамлакатларда бўлиб турган юртдошларимизнинг мазкур сайловда иштирок этиш тартиби тилга олингани баробарида ватандошларга элчихона биносида сайлов участкаси ташкил этилиши ва бўлажак сайлов қонунийлик, холислик, очиқлик, ошкоралик ҳамда шаффофлик тамойилларига тўла амал қилинган ҳолда ўтказилиши таъкидланди.

 Мулоқот давомида, шунингдек, Ўзбекистон Марказий сайлов комиссиясининг «Saylov 2021» веб-портали ва бошқа ахборот ресурслари ҳам тақдим этилди.

Учрашув сўнггида юртдошларимизни қизиқтираётган барча саволларга батафсил жавоб берилди.

Манба: “Дунё” ахборот агентлиги