Халқ таълими вазирининг 2021 йил 30 июндаги “Умумий ўрта таълим мактаб директорлари лавозимига номзодларни дастлабки тарзда саралаб олиш тартибини тасдиқлаш тўғрисида”ги буйруғига асосан Самарқанд вилоятидаги вакант мактаб директорлиги лавозимларига vacancy.argos.uz сайти орқали очиқ танлов ўтказилиб, номзодлар сараланмоқда.

Вилоят халқ таълими бошқармаси ахборот хизматининг ЎзАга маълум қилишича, синов тарзида Қўшработ туманидаги 45-, Нарпай туманидаги 21-, Тойлоқ туманидаги 32- ва Ургут туманидаги 43-, 99-мактаблардаги вакант директорлик лавозимларига сайт орқали танлов эълон қилинди.  

Натижада ушбу мактаблар директорлигига 44 нафар талабгор чиқди. Улар малака талаблари асосида дастлабки назоратдан ўтказилган 22 нафари синовдан муваффақиятли ўтиб, vacancy.argos.uz сайти орқали тест жараёнларига жалб қилинди.

Саралашнинг мазкур босқичидан муваффаққиятли ўтган номзодлар кўриб чиқиш учун халқ депутатлари маҳаллий кенгашларига тавсия этилади. 

Манба: ЎзА