Хабарингиз бор, шу йил 21-22 май кунлари Иорданиянинг Амман шаҳрида Осиё қитъаси таэквондочилари ўртасида Токио-2020 учун сўнгги лицензион турнир бўлиб ўтади. Ушбу мусобақада Ўзбекистондан 3 нафар (2 нафар қиз ва 1 нафар ўғил бола) спортчи иштирок этиш ҳуқуқига эга.

Ўзбекистон таэквондо WT терма жамоаси мураббийлар штаби олиб борилган йиғинлар ва сўнгги мусобақалардан келиб чиқиб, ушбу муҳим мусобақада кимлар қатнашиши борасида якуний қарорга келишди.

Демак, Амман шаҳридаги лицензион турнирда Ўзбекистон шарафини Улуғбек Рашитов, Нигора Турсунқулова ҳамда Светлана Осипова ҳимоя қилади.

Эслатиб ўтамиз, лицензион мусобақада финалга чиққан таэквондочилар Токиода ўтадиган Олимпиада ўйинларига йўлланмани қўлга киритишади.

Туризм ва спорт вазирлиги уччала спортчимизга ҳам лицензион мусобақада омад тилайди.

Манба: Ўзбекистон Республикаси Ёшлар сиёсати ва спорт вазирлиги