Муҳтарам Президентимиз томонидан мактабгача таълим тизимини ривожлантириш борасидаги, айниқса, чекка қишлоқларга қаратаётган эътибори натижасида ҳудудларда замонавий мактабгача таълим ташкилотлари барпо этилмоқда.

Бугун ана шундай иншоотлардан бири Мирзаобод тумани “Янги Ўзбекистон” маҳалласида “Қишлоқ курилиш инвест” МЧЖ ҳомийлиги асосида қурилган 2 қаватли “Янги авлод” давлат мактабгача таълим ташкилоти фойдаланишга топширилди.

Тантанали очилиш маросимида вилоят ҳокими Ғофуржон Мирзаев, Халқ таълими вазири Шерзод Шерматов, Мактабгача таълим вазири Агриппина Шин, вилоят ва туман сектор раҳбарлари, маҳалла фаоллари ҳамда кенг жамоатчилик вакиллари иштирок этишди.

Тадбирни вилоят ҳокими Ғофуржон Мирзаев кириш сўзи билан очиб берди.

Вилоят ҳокими Ғофуржон Мирзаев барчани янги мактабгача таълим ташкилоти ишга тушгани муносабати билан қутлар экан, тарбиянинг негизи бўлган мактабгача таълим ташкилотларини замон талаблари даражасида юқори савияда ташкил этиш, зарур анжомлар, малакали кадрлар билан таъминлаш етук, баркамол келажак авлодни тарбиялашда муҳим омил эканлигини таъкидлаб ўтди.

Янги қурилган мактабгача таълим ташкилотида гуруҳ ва санитария-гигиена хоналари, тиббиёт хонаси, мусиқа зали, алоҳида ошхона, умумий овқатланиш зали, ўйин майдончалари, ёзги айвончалар, мини футбол майдончаси ҳамда сузиш ҳавзаси барпо этилган.

Шу билан бир қаторда, Мактабгача таълим вазирлиги томонидан ҳомийлик ёрдамида болалар ёшига мос бўлган ўйинлар ва ўйинчоқлар тўпламлари, машғулотлар ўтказиш учун зарур кўргазма, тарқатма ва дидактик материаллар, замонавий мебель жиҳозлари, маиший техника, ошхона жиҳозлари билан таъминланди.

Манба: Сирдарё вилояти ҳокимлиги