Ўзбекистон Республикаси Президентининг 2020 йил 7 сентябрдаги ПФ-6061-сонли фармони билан Ўзбекистон Республикаси Ер ресурслари, геодезия, картография ва давлат кадастри давлат қўмитаси негизида Ўзбекистон Республикаси Давлат солиқ қўмитаси ҳузуридаги Кадастр агентлиги ташкил этилган эди.

Ўзбекистон Республикаси Президенти ва Вазирлар Маҳкамаси қарорлари билан Кадастр агентлиги директори ва унинг ўринбосарлари тайинланди.

Бугун, 22 сентябрь куни Давлат солиқ қўмитаси раиси Шерзод Кудбиев янги ташкил этилган Агентлик раҳбариятини таништирди. 

Ўзбекистон Республикаси Президенти қарори билан,

Халилилло Собиржонович Турахужаев Ўзбекистон Республикаси Давлат солиқ қўмитаси раисининг биринчи ўринбосари – Давлат солиқ қўмитаси ҳузуридаги Кадастр агентлиги директори лавозимига тайинланди. 

Халилилло Турахужаев 1972 йилда Наманган вилоятида туғилган. Маълумоти олий.  1997 йил Тошкент давлат юридик институтини “Ҳуқуқшунос” мутахассислиги бўйича тамомлаган.

Х.Турахужаев ҳуқуқий соҳадаги профессионал фаолиятини 1997 йил Ўзбекистон Республикаси Адлия вазирлигининг катта маслаҳатчиси лавозимидан бошлаган.

Х.Турахужаев бундан аввал Ер ресурслари, геодезия, картография ва давлат кадастри давлат қўмитаси раиси лавозимида ишлаб келаётган эди.

Халилилло Турахужаев 1-даражали адлия маслаҳатчиси.

Ўзбекистон Республикаси Вазирлар Маҳкамаси қарори билан,

Аллаберганов Атабек Валиджанович Ўзбекистон Республикаси Давлат солиқ қўмитаси ҳузуридаги Кадастр агентлиги директорининг биринчи ўринбосари этиб тайинланди. 

Атабек Аллаберганов 1977 йилда Хоразм вилоятитда туғилган. Маълумоти олий. 1999 йил Урганч давлат университетини “Иқтисодчи” мутахассислиги бўйича тамомлаган.

А.Аллаберганов меҳнат фаолиятини 2000 йилда Хоразм вилояти Урганч шаҳар давлат солиқ инспекцияси инспектори лавозимидан бошлаган. У янги лавозимга тайинлангунга қадар, Ўзбекистон Республикаси Президенти Администрацияси Ҳуқуқий экспертиза ва комплекс таҳлил қилиш департаментининг иқтисодий ривожланиш соҳасида тизимли таҳлил қилиш ва янги ташаббусларни ишлаб чиқиш шўъбаси етакчи инспектори лавозимида ишлаётган эди.

Атабек Аллаберганов иқтисодий фанлар номзоди, aдлия маслаҳатчиси. 

Абдуллаев Тулқин Мансурович Ўзбекистон Республикаси Давлат солиқ қўмитаси ҳузуридаги Кадастр агентлиги директори ўринбосари этиб тайинланди. 

Тулқин Абдуллаев 1961 йилда Самарқанд вилоятида туғилган. Маълумоти олий. 1988 йилда Москва геодезия, аэрофотосъёмка ва картография муҳандислари институтини “Муҳандис-геодезист” мутахассислиги бўйича тамомлаган.

Т.Абдуллаев меҳнат фаолиятини 1981 йилда Самарқанд аэрогеодезия корхонаси техник-топографи, муҳандиси, геодезисти сифатида бошлаган. У янги лавозимга тайинлангунга қадар Ўзбекистон Республикаси Ер ресурслари, геодезия, картография ва давлат кадастри давлат қўмитаси раисининг биринчи ўринбосари лавозимида ишлаб келаётган эди.

Тулқин Абдуллаев техника фанлари номзоди.

Мирмаксудов Мирсаид Садикович Ўзбекистон Республикаси Давлат солиқ қўмитаси ҳузуридаги Кадастр агентлиги директори ўринбосари этиб тайинланди.   

Мирсаид Мирмаксудов 1985 йилда Қўқон шаҳрида туғилган. Маълумоти олий. 2005 йилда Тошкент ахборот технологиялари университетини “Телекоммуникация” мутахассислиги бўйича тамомлаган.

М.Мирмаксудов меҳнат фаолиятини 2005 йилда “Ўзбектелеком” акциядорлик компанияси “Фарғонателеком” филиали Компьютерлаштириш ва ҳисоблаш маркази дастурчи-муҳандиси сифатида бошлаган. У янги лавозимга тайинлангунга қадар Давлат ахборот тизимларини яратиш ва қўллаб-қувватлаш бўйича “Ягона интегратор UZINFOCOM” масъулияти чекланган жамияти бош директори ўринбосари лавозимида фаолият юритаётган эди.

Абдуллаев Абдушукур Хамидович Ўзбекистон Республикаси Давлат солиқ қўмитаси ҳузуридаги Кадастр агентлиги директори ўринбосари – “Геоинновация маркази” давлат унитар корхонаси директори этиб тайинланди. 

Абдушукур Абдуллаев 1959 йилда Тошкент шаҳрида туғилган. Маълумоти олий. 1981 йил Тошкент политехника институтини “Муҳандис-механик” мутахассислиги бўйича тамомлаган.

А.Абдуллаев меҳнат фаолиятини 1981 йилда Тошкент политехника институти “Совутиш машиналари ва қурилмалари” кафедраси ассистенти сифатида бошлаган. У янги лавозимга тайинлангуга қадар Ўзбекистон Республикаси Ер ресурслари, геодезия, картография ва давлат кадастри давлат қўмитаси раиси лавозимида ишлаган.

Абдушукур Абдуллаев техника фанлари номзоди.

Манба: Ўзбекистон Республикаси Давлат солиқ қўмитаси