Тожикистон пойтахтида Ўзбекистон парламент делегациясининг икки мамлакат дўстлик ва ҳамкорлик парламентлараро гуруҳларининг биринчи қўшма йиғилишида иштирок этиши кутилмоқда, деб хабар бермоқда “Дунё” АА мухбири Тожикистоннинг “Ховар” агентлигига таяниб.

Олий Мажлис палаталари вакилларидан иборат Ўзбекистон делегациясига Қонунчилик палатаси раисининг ўринбосари Улуғбек Иноятов раҳбарлик қилади.

Мажлиси намояндагоннинг Ўзбекистон парламенти билан дўстлик ва ҳамкорлик гуруҳига Тожикистон Республикаси Мажлиси Олининг Мажлиси намояндагон раиси муовини Дилрабо Мансури бошчилик қилади.

“Ховар” маълумотига кўра, Парламент делегацияларининг учрашувларини 21 сентябрь куни ўтказиш режалаштирилган.

Ўзбекистон делегацияси Мажлиси намояндагон раиси Маҳмадтоир Зокирзода билан ҳам учрашиб, Турсунзода шаҳрига ташриф буюради.

Манба: “Дунё” ахборот агентлиги