Ички ишлар вазирлиги мамлакатимизда ўзбек тилининг давлат тили сифатидаги нуфузи ва мавқеини ошириш, вазирлик таълим муассасаларининг курсант (тингловчи) ва ўқувчи ёшларини ватанпарварлик, миллий анъана ва қадриятларга садоқат, улуғ аждодларимизнинг бой меросига ворислик руҳида тарбиялаш, ички ишлар органларида давлат тили тўғрисидаги қонун ҳужжатларига риоя этилишини таъминлаш ҳамда 21 октябрь – Ўзбек тили байрами кунини муносиб нишонлаш ва бу йўналишда амалга оширилаётган ишларни кенг тарғиб қилиш мақсадида “Ўзлигимиз тимсоли – Она тилим” мавзусида онлайн иншолар танлови эълон қилади.

Мазкур танлов Ички ишлар вазирлиги таълим муассасаларининг курсант (тингловчи) ва ўқувчилари ўртасида 2020 йил 10 сентябрдан 10 октябргача бўлган вақт оралиғида онлайн тарзда ўтказилади.

Танловни ташкил этиш тартиби

Танлов бир босқичда (республика миқёсида) ўтказилади.

Танловда иштирокчилар ўзбек тилида, қўлёзма шаклида ёзилган иншолари билан иштирок этади.

Танлов икки гуруҳ кесимида ўтказилади:

а) биринчи гуруҳ – Ички ишлар вазирлиги ихтисослаштирилган мактаб-интернати ва академик лицейлари ўқувчилари ўртасида;

б) иккинчи гуруҳ – Ички ишлар вазирлиги Академияси курсант ва тингловчилари ўртасида.

Биринчи гуруҳ доирасидаги иншолар 600 белгидан, иккинчи гуруҳ доирасидаги иншолар 1200 белгидан кам бўлмаслиги лозим.

Танловда иштирок этиш истагида бўлган Вазирлик таълим муассасаларининг курсант (тингловчи) ва ўқувчилари “Ўзлигимиз тимсоли – Она тилим” мавзусидаги иншоларини жорий йилнинг 15 октябрь кунига қадар электрон шаклда (муаллиф томонидан имзоланган сканер варианти билан биргаликда) Ички ишлар вазирлиги Бирлашган таҳририятининг “postda.uz” телеграм манзилига юборишлари лозим.

Танловга келиб тушган иншолар “postda.uz” телеграм манзили орқали эълон қилиб борилади ва Ҳакамлар ҳайъати аъзолари томонидан сараланиб, ғолиблар аниқланади.

Танлов натижалари ҳамда ғолибларнинг иншолари Вазирликнинг “iiv.uz”, “postda.uz” веб-сайтлари ва “Постда – На посту” газетаси орқали эълон қилинади.

Баҳолаш мезони

Иштирокчиларнинг иншолари қуйидаги мезонлар асосида 100 баллик тизимда баҳоланади:

а)  мавзу режа асосида тўлиқ ёритилганлиги – 30 баллгача;

б) мавзуни тўғри очиб берилганлиги, мустақил ижодий фикрлар ҳамда далиллар асосида равон ва грамматик қоидаларга риоя қилган ҳолда ёзилганлиги – 30 баллгача;

в) иншони ёзишда сўз бойлигининг кенглиги – 20 баллгача;

г) иншо мазмунига тарихий, адабий-бадиий, публицистик ва бошқа материалларнинг сингдирилганлиги – 10 баллгача;

д) имловий саводхонлиги – 10 баллгача.

Ғолибларни тақдирлаш

Танлов натижаларига кўра ғолиблар Ички ишлар вазирлигининг бир марта тўланадиган қуйидаги пул мукофотлари билан тақдирланади:

а) 1-ўрин учун I даражали Диплом ва базавий ҳисоблаш миқдорининг 10 баробари миқдорида пул мукофоти;

б) 2-ўрин учун II даражали Диплом ва базавий ҳисоблаш миқдорининг 7 баробари миқдорида пул мукофоти;

в) 3-ўрин учун III даражали Диплом ва базавий ҳисоблаш миқдорининг 5 баробари миқдорида пул мукофоти.

Ғолибларни тақдирлаш 21 октябрь – Ўзбек тили байрами кунига бағишланган тадбирларда тантанали равишда топширилади.

Танлов натижалари ҳамда ғолибларнинг иншолари Вазирликнинг “iiv.uz”, “postda.uz” веб-сайтлари ва “Постда – На посту” газетаси орқали эълон қилинади.

Манба: Ўзбекистон Республикаси Ички ишлар вазирлиги