ДУШАНБЕ, 13 сентябрь. ЎзА махсус мухбири Ғайрат Хонназаров хабар қилади.

Мамлакатимиз делегацияси “Ўзбекистон ва Тожикистон раҳбарларининг дўстлик, яхши қўшничилик ва ишончни мустаҳкамлашга қўшган ҳиссаси, Ўзбекистон – Тожикистон стратегик шериклигида янги саҳифанинг очилиши” мавзуидаги халқаро илмий-амалий конференцияда иштирок этиш учун Душанбе шаҳрига етиб келди.

Тожикистон Миллий Фанлар академияси ва Ўзбекистон Республикаси Фанлар академияси ҳамкорлигида ташкил этилган мазкур анжуманнинг очилиш маросимида қўшни давлат Миллий Фанлар академияси президенти Фарҳод Раҳимий, Ўзбекистон Республикаси Олий Мажлиси Қонунчилик палатаси Спикерининг биринчи ўринбосари, академик Акмал Саидов ва мамлакатимизнинг Тожикистондаги Фавқулодда ва мухтор элчиси Эргаш Шоисматов табрик сўзи билан иштирок этади.

Кун тартибининг дастлабки тадбири – ялпи мажлисда икки давлат етакчи олимлари, экспертлар ўзбек ва тожик халқлари файласуфлари ҳамкорлигининг тарихи, бугунги куни ва истиқболи, мамлакатларимиз ўртасидаги стратегик ва минтақалараро алоқалар, Ўзбекистон – Тожикистон савдо-иқтисодий муносабатлари ривожланиши тенденциялари, маданий интеграция каби долзарб масалаларга ўрин ажратилган. Маъруза ва мунозаралардан сўнг шўъба йиғилишлари бошланади.

Манба: ЎзА