Булунғур туман халқ таълими бўлими тасарруфида 69 та умумий ўрта таълим мактаби бор. Уларда 37152 нафар ўқувчи таълим-тарбия олади. 27115 нафар ўқувчининг ота-онаси фарзандининг бевосита мактабда анъанавий тарзда таълим олишига розилик билдирган.

68 та мактабда янги ўқув йилига тайёргарлик ишлари олиб борилган. 35-умумтаълим мактабида Инқирозга қарши курашиш жамғармаси маблағлари ҳисобидан реконструкция ишлари олиб борилиб, 270 ўринли қўшимча янги бино қурилмоқда. 7 та мактабнинг хожатхоналари янгидан қурилиб, қолган мактаб хожатхоналарида таъмирлаш ишлари амалга оширилган. Мактабларни янги ўқув йилига ва куз-қиш мавсумига тайёрлаш ишларига маҳаллий бюджетдан 2 млрд 13 млн сўмдан ортиқ маблағ ажратилган.

Карантин даврида мактабларнинг зарур санитар-гигиеник талабларга жавоб бериши юзасидан 5 сентябрга қадар 48 та умумтаълим мактабларида соғлиқни сақлаш ва санитария-эпидемиологик осойишталик маркази томонидан ўрганиш ишлари олиб борилган. 22 та мактабнинг 1416 нафар ўқитувчиларидан коронавирусга қарши тест олинган. Шунингдек, барча мактаб директорлари ва ўринбосарлари учун сектор раҳбарлари иштирокида халқ таълими бўлими, ички ишлар, соғлиқни сақлаш соҳалари масъул ходимлари томонидан карантин даврида мактаб фаолиятини ташкил этиш бўйича амалий семинарлар ўтказилган.

Самарқанд вилояти халқ таълими бошқармаси ахборот хизмати.

Манба: Ўзбекистон Республикаси Мактабгача ва мактаб таълими вазирлиги