2020 йилнинг 18 август куни Ўзбекистон Республикасининг Фавқулодда ва Мухтор Элчиси Баҳром Ашрафхоновнинг Озарбайжон Республикаси Президенти Илҳом Алиевга ишонч ёрлиқларини топшириш маросими бўлиб ўтди.

Расмий маросимдан кейин бўлиб ўтган суҳбат чоғида Озарбайжон раҳбари мамлакатларимиз ўртасидаги деярли барча соҳалар ва йўналишларни қамраб олган муносабатлар изчил ва жадал ривожланиб бораётганини юқори баҳолади. Олий даражадаги яқин ва ишончли мулоқот ўрнатилгани буларнинг барчасига асос бўлаётгани таъкидланди.

Шунингдек, сиёсий ва савдо-иқтисодий соҳалардаги икки томонлама ҳамкорликнинг долзарб жиҳатлари ҳамда Ислом ҳамкорлик ташкилоти, Туркий тилли давлатлар ҳамкорлик кенгаши ва бошқа кўп томонлама тузилмалар доирасидаги ўзаро муносабатлар юзасидан фикр алмашилди.

Суҳбат сўнггида Илҳом Алиев Ўзбекистон халқи ва Президенти Шавкат Мирзиёевга ўзининг самимий қутловлари ва энг эзгу тилакларини етказди.

Манба: Ўзбекистон Республикаси Ташқи ишлар вазирлиги