2020 йилнинг 29 июль куни Ўзбекистон Республикаси Олий Мажлиси Сенати ва халқ депутатлари вилоят кенгашлари аъзолари Ташқи ишлар вазирлигининг 2020 йилнинг биринчи ярмида иқтисодий дипломатия соҳасидаги фаолияти натижалари билан танишди.

Мақсад ташқи иқтисодий алоқалар бўйича Ташқи ишлар вазирлиги ва маҳаллий ҳокимият органлари ўртасидаги ҳамкорликнинг ҳозирги ҳолатини ўрганиш ва унинг самарадорлигини оширишга қаратилган янги амалий таклифларни ишлаб чиқишдан иборат.

Тадбирда Ташқи ишлар вазири ўринбосари Илҳом Неъматов сўзга чиқиб, йиғилганларни Ташқи ишлар вазирлигининг хорижий инвестицияларни жалб қилиш ва экспортни ривожлантириш борасидаги фаолияти тўғрисида хабардор қилди.

Унинг сўзларига кўра, идоралараро ҳамкорликни кучайтириш мақсадида Ташқи ишлар вазирлиги ҳамда Инвеститициялар ва ташқи савдо вазирлиги ташаббуси билан “Мувофиқлаштирувчи гуруҳ” кўринишида жорий этилган янги механизм “дипломатик ваколатхоналар-вазирликлар-ҳокимликлар”  йўналиши бўйича тўғридан-тўғри ва тезкор маълумот алмашишни ўз ичига олади.

Йил бошида ҳар бир ҳудудга қўшимча равишда 10 та дипломатик ваколатхона бириктирилгани таъкидланди. Бундан ташқари, Ташқи ишлар вазирлиги марказий аппарати ходимлари республиканинг ҳар бир туман ва шаҳарларига бириктирилган, улар ИТСВ билан биргаликда маҳаллий ҳокимият органларига ташқи иқтисодий ҳамкорлик масалаларини илгари суришда ёрдам беришмоқда.

Масалан, жорий йилнинг апрел-июн ойларида элчихоналарнинг бевосита ёрдами билан умумий қиймати 513 миллион АҚШ долларига тенг 492 та янги экспорт шартномалари тузилди.

Хорижий инвестицияларни жалб қилиш соҳасида дипломатик ваколатхоналар Фарғона, Наманган, Бухоро, Жиззах, Самарқанд, Сурхондарё ва Навоий вилоятлари ҳокимликлари билан биргаликда умумий қиймати 814 миллион АҚШ долларига тенг 106 та лойиҳани ишлаб чиқдилар, уларни чет элда яшаётган ватандошлар иштирокида амалга ошириш режалаштирилмоқда.

Илҳом Неъматов Ташқи ишлар вазирлиги мамлакатимизда “COVID-19” пандемиясининг оқибатларини юмшатиш бўйича аниқ мақсадли ишларни амалга оширганини таъкидлади. Хусусан, жами 11,6 миллион долларлик гуманитар юклар ҳамда молиявий ва техник ёрдам жалб этилди.

Бундан ташқари, Бухоро ва Сирдарё вилоятларининг зарар кўрган ҳудудларига ёрдам бериш учун Ўзбекистоннинг чет элдаги элчихоналари 700 минг доллар миқдорида беғараз ёрдам кўрсатдилар.

Учрашувда Андижон, Қашқадарё, Хоразм, Сирдарё, Бухоро вилоятлари ва Тошкент шаҳар ҳокимликларининг вакиллари сўзга чиқиб, ташқи иқтисодий алоқалар бўйича ўзаро ҳамкорлик самарадорлигини ошириш борасида аниқ таклифларни билдирди.

Манба: Ўзбекистон Республикаси Ташқи ишлар вазирлиги