Тадбирда сўз олган Андижон вилояти ҳокими Ш.Абдураҳмонов, Ўзбекистон Республикаси Бош вазири ўринбосари Э.Ғаниев, Ҳиндистоннинг Гужарат штати бош вазири В.Рупани, Ўзбекистон Республикаси Ташқи ишлар вазири ўринбосари И.Неъматов, Ўзбекистон Республикаси Савдо-саноат палатаси раиси А.Икромов ва бошқалар томонидан форумнинг мақсади, аҳамияти, юртимизда қулай инвестиция муҳитини яратиш, мамлакатимиз ҳамда хорижий ишбилармон доиралар ўртасида инвестицион ҳамкорлик кўламини кенгайтириш бўйича кенг кўламли ишлар олиб борилаётганлиги таъкидланди.

- Инвестиция форуми мамлакатимиз тадбиркорларига хорижлик инвесторлар билан мустаҳкам алоқалар ўрнатиш имконини беради, - деди Андижон вилояти ҳокими Ш.Абдураҳмонов. – Қолаверса, мазкур йўналишдаги ишларни янада юқори босқичга кўтариш баробарида юқори самаралар беради.

“Open Andijan” I халқаро инвестиция форумида Ҳиндистон, Россия, Қозоғистон, Қирғизистон, Германия, Беларусь, Руминия, Озарбайжон, Корея, Эрон, АҚШ, Украина, Буюк Британия сингари 29 давлат делегациялари иштирок этаётганлиги қайд этилди.

Форумнинг биринчи иш кунида Андижон вилоятининг қишлоқ хўжалиги маҳсулотларини ишлаб чиқариш ва қайта ишлаш, сайёҳлик, тўқимачилик, автомобилсозлик ҳамда фармацевтика саноати йўналишларидаги салоҳияти бўйича тақдимотлар ўтказилмоқда.

Асосий тадбирдан сўнг форум иштирокчилари Ҳиндистоннинг Шарда университети Андижон филиали очилишида иштирок этди.

Маълумки, Ўзбекистон ва Ҳиндистон ўртасида таълим соҳасидаги ҳамкорлик доирасида Андижонда Шарда университетининг филиалини ташкил этишга келишилган эди. Унга кўра, ушбу нуфузли университетнинг филиалини ташкил этиш учун 100 миллион АҚШ доллари миқдорида инвестиция киритилиши белгиланган. Жорий йилда ушбу даргоҳга муҳандислик, ахборот технологиялари ва бизнес йўналишлари бўйича 400 нафарга яқин талаба қабул қилинган.