Фарғона туманидаги “Чимён шуҳрати” фермер хўжалиги жорий йилда 60 гектар майдонда пахта етиштирди. Шундан 20 гектарида томчилатиб суғориш усулини синаб кўрди. Айнан томчилатиб суғориш усули қўлланилган майдондан ҳосилдорлик юқори бўлди. Фермер хўжалиги биринчи теримнинг ўзидаёқ режани ошиғи билан уддалади.

– Ўтган йили худди шу майдонга ғўза экиб, гектарига 18 центнердан ҳосил олган эдик. Бу йил биринчи теримнинг ўзидаёқ ҳосилдорлик 40 центнердан ошди. Иккинчи теримдан сўнг гектарига 50 центнерга чиқди. Энди очилаётган кўсаклар ҳисобига ҳосил чўғи яна ошади - дейди “Чимён шуҳрати” фермер хўжалиги раҳбари Шавкат Қаюмов. – Томчилатиб суғориш технологияси орқали олдингидан икки ҳатто уч баравар кўп ҳосил олиш мумкинлигини ўз еримда синовдан ўтказдим. Бу йил биринчи марта бўлгани учун тажриба тўпладик. Кейинги йилларда хирмонимиз бунданда юксалишига ишонч ҳосил қилдим.

Фермер 2020 йилда яна 24 гектар майдонга томчилатиб суғоришни жорий этишни мўлжалламоқда. Шу мақсадда замонавий технологияни ишлаб чиқарувчи компания билан шартнома тузиб қўйди.

Манба: Ўзбекистон Республикаси сув хўжалиги вазирлиги