Мактабгача таълим тизимини ривожлантириш масалаларида ҳамкорлик доирасида, вазир Агриппина Шин бошчилигидаги МТВ делегацияси 23–27 сентябрь кунлари корейс томони таклифига кўра Корея Республикасида расмий ташриф билан бўлди.

Ташриф давомида KOICA раҳбарияти билан мактабгача таълим тизимини ривожлантиришни давом эттириш бўйича лойиҳаларни амалга ошириш масалалари муҳокама этилди. Учрашув давомида, ўзбек томони KOICA молиявий ва техник кўмагида Ўзбекистонда қатор лойиҳаларни амалга ошириш режалаштирилаётганини таъкидлади. Мактабгача таълим тизимига инновациялар, замонавий педагогик ва ахборот–коммуникация технологияларини татбиқ қилиш, кадрлар тайёрлаш, қайта тайёрлаш, малакасини ошириш, танлаш ва ривожлантиришга янги ёндашувлар шулар жумласидандир. Айни вақтда, мактабгача таълимни ривожлантириш, унга инновацион технологияларни тадбиқ этиш мақсадида инновацион МТТ ҳамда Корея Республикаси замонавий тажрибаси асосида мутахассисларни қайта тайёрловчи ўқув Маркази ташкил этиш лойиҳалари устида иш олиб борилмоқда.

* * *

МТВ делегацияси мутахассислар алмашиш волонтёрлик(кўнгиллилар) дастурлари, шунингдек мактабгача таълим мутахассислари учун Корея Республикасида ўқув курслари ва тренинглар ташкил этиш масалаларига катта қизиқиш билдирди.

KOICA вице–президенти, профессор Пак Жей Шин, вазирлик ва агентлик ўртасидаги ҳамкорликни юқори баҳолади ҳамда ушбу ҳамкорликни келгусида ҳам қўллаб-қувватлашга тайёрлигини билдирди. Лойиҳаларни муваффақиятли амалга ошириш мақсадида жорий йил октябрь ойида мактабгача талим тизимининг ҳолатини ўрганиш ва танишиш мақсадида KOICAнинг баҳолаш миссияси Ўзбекистонга ташриф буюради.

Манба: Ўзбекистон Республикаси Мактабгача таълим вазирлиги