Жорий йилнинг 16 сентябрь куни Инвестициялар ва ташқи савдо вазири С. Умурзаков раҳбарлигида видеоконференц алоқа шаклида муҳокама ўтказилди. Унда тегишли вазирлик ва идоралар, Фарғона вилояти ва Тошкент шаҳар ҳокимликларининг рахбарлари, шунингдек, Ўзбекистон Республикасининг Япониядаги Фавқулодда ва Мухтор элчиси Г.Фозилов иштирок этдилар.

Музокара давомида япониялик ҳамкорлар билан инвестиция, молия-техник ва савдо-иқтисодий ҳамкорликнинг янги истиқболларини ишлаб чиқиш бўйича тадбирлар режаси муҳокама қилинди.

Япония технологияларининг ривожланиш даражаси ва иқтисодиётининг ўзига хос хусусиятлари Ўзбекистоннинг турли саноат соҳаларида ва қишлоқ хўжалиги йўналишидаги йирик юқори технологик лойиҳаларни япониялик эксперт ва мутахассисларнинг илғор тажрибаларини асосида амалга ошириш учун замин яратаётганлиги таъкидланди.

Муҳокама давомида истиқболли лойиҳа таклифлар ҳам кўриб чиқилди, вазирлик ва идоралар рахбарларининг хизмат сафарлари жадвали ишлаб чиқилди, салоҳиятли япониялик ҳамкорлар билан музокараларнинг устувор йўналишлари ва мавзулари белгилаб олинди.

Муҳокама натижасида идоралараро ишчи гуруҳ иштирокчилари Япония билан инвестиция, савдо-иқтисодий, молиявий ва техник ҳамкорликнинг асосий мувофиқлаштирувчиси бўлган Инвестициялар ва ташқи савдо вазирлигига янги лойиҳаларни ишлаб чиқишда эришилган натижалар тўғрисида доимий равишда маълумот бериб боришлари келишиб олинди.

Манба: Ўзбекистон Республикаси инвестициялар, саноат ва савдо вазирлиги