Ўзбекистон Республикаси Президенти Шавкат Мирзиёев яқинда Олий Мажлис Сенатининг йигирманчи ялпи мажлисидаги нутқида ҳозирги глобаллашув жараёнида хотин-қизларнинг ҳуқуқ ва эркинликларини, қонуний манфаатларини ҳимоя қилиш, уларнинг ижтимоий-иқтисодий ва сиёсий-ҳуқуқий фаоллигини ошириш борасида амалга оширилаётган кенг қамровли ишларга тўхталиб ўтган эди. Бош вазир Президентимизнинг ушбу нутқида таъкидлаб ўтилган муаммоларни бартараф этиш юзасидан республикамизнинг энг чекка ҳудудида қандай ишлар амалга оширилаётгани билан қизиқди.

 

А.Арипов посёлкадаги “Устюрт чеварлари” масъулияти чекланган жамиятида бўлиб, бу ерда ишлаётган хотин-қизлар билан учрашди. Учрашув давомида Қорақалпоғистон Республикаси Вазирлар Кенгаши Раисининг ўринбосари, Республика хотин-қизлар қўмитаси раиси З.Ибрагимова республикада хотин-қизларни ҳар томонлама қўллаб-қувватлаш, уларни бандлигини таъминлаш, хотин-қизлар билан мақсадли ишларни ташкил этиш, оилаларда маънавий-ахлоқий муҳитни мустаҳкамлашга тўсқинлик қилаётган муаммо ва камчиликларни бартараф этиш мақсадида қатор ишлар амалга оширилаётганлигини таъкидлади.

 

 

Шу йилнинг июль ойи бошларида иш бошлаган “Устюрт чеварлари” МЧЖ да бугунги кунда 50 нафар хотин-қиз иш билан таъминланган. Президентимизнинг ташаббуси билан татбиқ этилган тизим – “Обод қишлоқ” дастури доирасида “Қорақалпоғистон” посёлкаси фуқаролар йиғинидаги бу корхона қайта ишга туширилди. Айни вақтда “Ўзтрансгаз” АЖ Қорақалпоғистонгаз филиалининг туман бўлими билан 300 миллион доллар ҳажмида маҳсулот етказиб бериш юзасидан шартнома имзоланган.

 Шунингдек, корхонада шу ҳудудда яшаётган аҳолининг эҳтиёжидан келиб чиқиб ва ички бозорни ўрганган ҳолда кундалик қўлланиладиган кўрпа-кўрпача чойшаблари, ёстиқжилдлар, кийимлар ҳам тикилмоқда. Келажакда “Устюрт чеварлари” МЧЖ бошлиғи Г.Базарбаева таъкидлаб ўтганидек, ишлаб чиқариш кўламини кенгайтириб, яна 30 нафар хотин-қизни, айниқса, касб-ҳунар коллежлари битирувчиларини иш билан таъминламоқчи. Шунингдек, у қўшни Қозоғистон Республикасининг бизга энг яқин ҳудуди Бейнеў туманига тайёр маҳсулотларни экспорт қилиш мақсадида. “Бейнеў – Ақжигит – Ўзбекистон чегараси” автомагистралининг очилиши бўлса, тадбиркорлар учун янги имкониятлар эшигини очмоқда.