2019 йилнинг 22-26 апрель кунлари Гулистон шаҳрида Ўзбекистон-Қозоғистон қўшма демаркация комиссиясида Ўзбекистон Республикаси ва Қозоғистон Республикаси Ҳукуматлари делегацияларининг навбатдаги йиғилиши бўлиб ўтди.

Тадбир давомида Ўзбекистон-Қозоғистон Давлат чегараси демаркациясининг якуний ҳужжатлари лойиҳаларини тайёрлаш бўйича ишлар давом эттирилди.

Қозоғистон делегациясининг Ўзбекистонга ташрифи мобайнида давлатлараро чегаранинг айрим участкаларида қўшма дала текширувлари ўтказилди.

Учрашувда Ўзбекистоннинг Тошкент ва Жиззах вилоятлари ҳамда Қозоғистоннинг Туркистон вилояти ўртасидаги Давлат чегарасининг айрим участкаларида демаркация чизиғини ўтказиш бўйича таклифлар юзасидан фикрлар алмашилди.

Йиғилиш дўстлик ва ҳамжиҳатлик руҳида ўтди.

Музокаралар якунларида делегация раҳбарлари - Ўзбекистон Ергеодезкадастр давлат қўмитаси раисининг биринчи ўринбосари Тўлқин Абдуллаев ва Қозоғистон ТИВнинг махсус топшириқлар бўйича Элчиси Вячеслав Гиззатов тегишли Протокол имзоладилар.

Учрашувлар жадвалига биноан навбатдаги йиғилиш Қозоғистон ҳудудида бўлиб ўтади.

Манба: Ўзбекистон Республикаси Ташқи ишлар вазирлиги