19 апрель куни Корея Республикаси Президенти Мун Чже Иннинг Ўзбекистонга давлат ташрифи доирасида Ўзбекистон Республикаси Инновацион ривожланиш вазири Иброҳим Абдураҳмонов ҳамда Корея Республикаси Илм-фан ва ахборот коммуникация технологиялари вазири Ю Ёнг Мин илм-фан, технологиялар ва инновация соҳаларида ҳамкорлик бўйича Ўзаро ҳамкорлик тўғрисида меморандум имзоладилар.

Ўзбекистон кўплаб хорижий мамлакатлар билан амалий ўзаро ҳамкорликни фаол ривожлантирмоқда. Бунда юқори иқтисодий, илмий-техник, инновацион ва интеллектуал имкониятларга эга бўлган Корея Республикаси билан илмий-техник ва инновацион ҳамкорликка алоҳида эътибор қаратилмоқда.

2018 йили Корея Республикаси ялпи ички маҳсулотнинг 4,24 фоизини, яъни 79,4 млрд. АҚШ доллари миқдоридаги маблағни илм-фан соҳасига сарфлаб, дунёда илм-фанга энг кўп эътибор берувчи мамлакатлар ичида 2-ўрини эгаллади. Шуларни инобатга олган ҳолда мазкур мамлакат билан инновация соҳасида самарали муносабатларни ўрнатиш ўта муҳимдир.

Ўтган йилларда Ўзбекистон ва Корея илмий жамоатчилиги ўртасидаги илмий-техник алоқаларни мустаҳкамлаш мақсадида Корея ривожланиш институти, Корея илмий-техник ахборот институти, Корея политехника университети, Корея илм-фан ва техника жамғармаси ва муассасалар билан қатор илмий-тадқиқот ишлар бажарилган.

Илмий-техник ҳамкорлик доирасида қайта тикланувчи ва муқобил энергия манбалари, соғлиқни сақлаш, физика-кимё, ахборот ва коммуникация, ишлаб чиқариш технологиялари, қишлоқ хўжалиги соҳаларида ҳамкорликдаги илмий-тадқиқот лойиҳалари амалга оширилмоқда. Мазкур лойиҳалар ўзбек олимларининг илмий тадқиқот ишларига Корея инвестицияларини жалб этиш, Корея илмий лабораторияларининг асбоб-ускуналари ва материалларидан фойдаланишга, шунингдек халқаро илмий журналларида мақолаларини чоп этишга хизмат қилади.

Ўзбекистон Республикаси Инновацион ривожланиш вазирлиги ҳамда Корея Республикаси Илм-фан ва ахборот коммуникация технологиялари вазирлиги ўртасида ҳамкорликнинг ўрнатилиши икки мамлакат илмий жамоатчилиги ўртасидаги ҳамкорликнинг самарали ривожланишига туртки бўлади.

Манба: Ўзбекистон Республикаси Инновацион ривожланиш агентлиги