Франциянинг Европа ва ташқи ишлар бўйича вазири ҳузуридаги давлат котиби Жан–Батист Лемуан бошчилигидаги делегация аъзолари юртимизга ташрифини 16 апрель куни Самарқанддан бошлади.

Самарқанд вилояти ҳокими Э.Турдимов билан учрашувда Ўзбекистон ва Франция ўртасида савдо-иқтисодий, маданий-гуманитар ва бошқа соҳаларда алоқаларнинг тобора ривожланиб бораётгани таъкидланди. Ўзбекистон Республикаси Президенти Ш.Мирзиёевнинг 2018 йил октябрь ойида Францияга амалга оширган ташрифи бу алоқаларни янги босқичда, кенг кўламда давом эттириш имкониятларини кенгайтирди.

Жумладан, Самарқанд вилоятида ҳам француз ишбилармонлари ва компаниялари билан ҳамкорликда муҳим лойиҳалар амалга оширилмоқда. Франция тараққиёт агентлигининг “Самарқанд шаҳрида қаттиқ маиший чиқиндиларни бошқаришни модернизация қилиш” лойиҳаси доирасида шаҳарда атроф-муҳитни муҳофаза қилиш, табиий ресурслардан самарали фойдаланиш ва уларни асраб-авайлаш, чиқиндиларни йиғиш, қайта ишлаш ва ва инновацион ечимлар ёрдамида зарарсизлантиришгача бўлган жараёнларни ўз ичига олган чиқиндиларни комплекс бошқариш тизими яратилмоқда. 

Учрашувда мазкур лойиҳани сифатли ва белгиланган муддатларда амалга ошириш юзасидан фикр алмашилди.

Шундан сўнг делегация аъзолари Самарқанд шаҳрида ташкил этилган Франциянинг фахрий консуллиги очилишида иштирок этди.

– Франция ва Ўзбекистон ўртасидаги алоқалар тарихи узоқ ўтмишга бориб тақалиши барчага яхши маълум, – дейди Жан–Батист Лемуан. – Кейинги пайтда бу ҳамкорлик яна ҳам мустаҳкамланиб бораётгани қувонарли. Айниқса, ўтган йил кузда икки давлат президентларининг учрашувидан сўнг муносабатларимиз яна ҳам яхшиланди. Марказий Осиё давлатлари орасида илк бор Ўзбекистонда, унинг гўзал шаҳри бўлган Самарқандда фахрий консуллигимизнинг очилиши ҳам бу фикрни тасдиқлайди. Ўйлайманки, ушбу муассаса давлатларимиз ҳамда ўзбек ва француз халқларининг яқин ҳамкорлигини мустаҳкамлашга хизмат қилади. 

Меҳмонлар Самарқанд шаҳридаги тарихий обидаларни томоша қилди ва куннинг иккинчи ярмида Тошкентга жўнаб кетди.

Ғ.Ҳасанов, ЎзА

Манба: ЎзА