Жорий йилнинг 28 март куни Вазирлар маҳкамаси ҳузуридаги Таълим сифатини назорат қилиш Давлат инспекцияси ҳамда UNICEF нинг Ўзбекистондаги ваколатхонаси билан “Барчага сифатли таълим” лойиҳасини амалга ошириш учун расмий келишув имзоланди. Ушбу лойиҳа 2 йил давомида амалга оширилиши режалаштирилган бўлиб, унинг асосий мақсади таълимни тўғри йўналтиришга тўсиқ бўлаётган кўплаб салбий омилларни бартараф этишга қаратилган.

Мазкур лойиҳа доирасида UNICEF Ўзбекистон ҳукуматига қуйидаги йўналишларда амалий кўмак беради:

• Сифатли таълим барчага шиори остида қонуний ҳамда норматив-ҳуқуқий базани мустаҳкамлаш, жумладан таълим тўғрисидаги қонунни ҳам такомиллаштириш.
• Миллий таълим сифатини баҳолаш тизимини такомиллаштириш, шунингдек таълимни бошқаришнинг ахборотлашган ягона тизимини яратиш.
• Миллий таълим сифатини баҳолаш тизимини шакллантиришда унинг халқаро стандартларга мослиги ҳамда миллий баҳолаш тизимини яратиш ва тадбиқ қилишда маҳаллий экспертларнинг салоҳиятини оширишга катта эътибор қаратилади.

2019 -2020 йиллар оралиғида амал қилиши режалаштирилган ушбу лойиҳанинг устувор вазифалари сифатида эса қуйидагилар қайд қилинган:

• Таълим сифатининг янги стандартларини ва миллий баҳолаш тизимларини ишлаб чиқишда билим, малака ҳамда компетентликни ошириш орқали мазкур имкониятларнинг замонавий ҳамжамиятдаги ва иқтисодиётдаги аҳамиятини инобатга олган холда халқаро стандартлар асосида амалга ошириш.
• Мактабгача таълим муассасалари фаолиятини кенгайтириш ва уларга жалб қилиш қамровини ошириш орқали узлуксиз таълим тизимининг самаралилигини ошириш.
• Иқтисодий ва экологик офатларнинг талофатлари ҳақида огоҳлантириш ва уларни бартараф этувчи тизимларни такомиллаштириш.

Юқорида келтирилган мақсадлар юзасидан қуйидаги чора-тадбирлар ўтказилиши кўзда тутилган:

• Республика ҳукуматига “Таълим тўғрисидаги” қонунни такомиллаштиришда бола ҳуқуқларига мос равишда ёндашув жиҳатидан кўмаклашиш.
• Миллий баҳолаш тизимларини такомиллаштириш ҳамда уларнинг аниқ далилларга асосланган қарор қабул қилиш жараёнларидаги қўлланиш имкониятларини ошириш.
• Таълим сектори сифати мониторинги кўрсаткичларини шакллантириш воситалари ишлаб чиқиш ва уларни қўллашда амалий ёрдам бериш.

Мазкур режалаштирилган истиқболли мақсадларнинг натижаси сифатида лойиҳа якунида қуйидагилар кутилади:

Барча учун умр давомида таълим олишда узлуксиз сифатли таълим олиш ва ўқитиш имкониятлари кенгайтирилади.

Ноқулай иқлим шароитидаги ҳудудларда табиий ресурсларни бошқариш орқали иқлим ўзгаришлари ва табиий офатларга чидамли ўқув муҳитлари шакллантирилади.

Шунингдек, ҳукумат даражасида ҳар бир бола учун инклюзив ва сифатли умумий ўрта таълим тизими дастурларининг ишлаб чиқилиши ва амалга оширилишида махсус восита ҳамда малакаларнинг қўлланилишига алоҳида урғу берилади.

Маълумот ўрнида ушбу лойиҳада келтирилган вазифаларни самарали амалга оширишда Вазирлар Маҳкамаси, Халқ таълими вазирлиги, Мактабгача таълим вазирлиги, Молия вазирлиги, Давлат Статистика қўмитаси каби вазирлик ва идоралар билан ҳам яқиндан ҳамкорлик қилиниши ҳақида хабар берилмоқда.

Манба: Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси