Joriy yilning 28-mart kuni Vazirlar mahkamasi huzuridagi Taʼlim sifatini nazorat qilish Davlat inspeksiyasi hamda UNICEF ning Oʻzbekistondagi vakolatxonasi bilan “Barchaga sifatli taʼlim” loyihasini amalga oshirish uchun rasmiy kelishuv imzolandi. Ushbu loyiha 2 yil davomida amalga oshirilishi rejalashtirilgan boʻlib, uning asosiy maqsadi taʼlimni toʻgʻri yoʻnaltirishga toʻsiq boʻlayotgan koʻplab salbiy omillarni bartaraf etishga qaratilgan.

Mazkur loyiha doirasida UNICEF Oʻzbekiston hukumatiga quyidagi yoʻnalishlarda amaliy koʻmak beradi:

• Sifatli taʼlim barchaga shiori ostida qonuniy hamda normativ-huquqiy bazani mustahkamlash, jumladan taʼlim toʻgʻrisidagi qonunni ham takomillashtirish.
• Milliy taʼlim sifatini baholash tizimini takomillashtirish, shuningdek taʼlimni boshqarishning axborotlashgan yagona tizimini yaratish.
• Milliy taʼlim sifatini baholash tizimini shakllantirishda uning xalqaro standartlarga mosligi hamda milliy baholash tizimini yaratish va tadbiq qilishda mahalliy ekspertlarning salohiyatini oshirishga katta eʼtibor qaratiladi.

2019 -2020-yillar oraligʻida amal qilishi rejalashtirilgan ushbu loyihaning ustuvor vazifalari sifatida esa quyidagilar qayd qilingan:

• Taʼlim sifatining yangi standartlarini va milliy baholash tizimlarini ishlab chiqishda bilim, malaka hamda kompetentlikni oshirish orqali mazkur imkoniyatlarning zamonaviy hamjamiyatdagi va iqtisodiyotdagi ahamiyatini inobatga olgan xolda xalqaro standartlar asosida amalga oshirish.
• Maktabgacha taʼlim muassasalari faoliyatini kengaytirish va ularga jalb qilish qamrovini oshirish orqali uzluksiz taʼlim tizimining samaraliligini oshirish.
• Iqtisodiy va ekologik ofatlarning talofatlari haqida ogohlantirish va ularni bartaraf etuvchi tizimlarni takomillashtirish.

Yuqorida keltirilgan maqsadlar yuzasidan quyidagi chora-tadbirlar oʻtkazilishi koʻzda tutilgan:

• Respublika hukumatiga “Taʼlim toʻgʻrisidagi” qonunni takomillashtirishda bola huquqlariga mos ravishda yondashuv jihatidan koʻmaklashish.
• Milliy baholash tizimlarini takomillashtirish hamda ularning aniq dalillarga asoslangan qaror qabul qilish jarayonlaridagi qoʻllanish imkoniyatlarini oshirish.
• Taʼlim sektori sifati monitoringi koʻrsatkichlarini shakllantirish vositalari ishlab chiqish va ularni qoʻllashda amaliy yordam berish.

Mazkur rejalashtirilgan istiqbolli maqsadlarning natijasi sifatida loyiha yakunida quyidagilar kutiladi:

Barcha uchun umr davomida taʼlim olishda uzluksiz sifatli taʼlim olish va oʻqitish imkoniyatlari kengaytiriladi.

Noqulay iqlim sharoitidagi hududlarda tabiiy resurslarni boshqarish orqali iqlim oʻzgarishlari va tabiiy ofatlarga chidamli oʻquv muhitlari shakllantiriladi.

Shuningdek, hukumat darajasida har bir bola uchun inklyuziv va sifatli umumiy oʻrta taʼlim tizimi dasturlarining ishlab chiqilishi va amalga oshirilishida maxsus vosita hamda malakalarning qoʻllanilishiga alohida urgʻu beriladi.

Maʼlumot oʻrnida ushbu loyihada keltirilgan vazifalarni samarali amalga oshirishda Vazirlar Mahkamasi, Xalq taʼlimi vazirligi, Maktabgacha taʼlim vazirligi, Moliya vazirligi, Davlat Statistika qoʻmitasi kabi vazirlik va idoralar bilan ham yaqindan hamkorlik qilinishi haqida xabar berilmoqda.