Ўзбекистон Республикаси инновацион ривожланиш вазири ўринбосари Азимжон Назаров бошчилигидаги ишчи гуруҳ вазирлик томонидан тақдим этилган лойиҳаларининг жорий этилишини ўрганиш, ҳудуднинг инновацион эко тизимини яратиш борасида таклифлар ишлаб чиқиш мақсадида Қорақалпоғистон Республикасига ташриф буюрди.

Азимжон Назаров, вазирлик ходимлари ҳамда Қорақалпоғистон Республикаси Вазирлар Кенгаши раисининг биринчи ўринбосари Ж.Казбеков, Оролбўйи халқаро инновация маркази ходимлари Президентимизнинг ташаббусларидан келиб чиқиб, Мўйноқ туманидаги 7-сонли мактабга ўзбек, рус ва қорақалпоқ тилларидаги китоблар билан бир қаторда инновацион QR кодли китоб ҳам тақдим этдилар.

Шу билан бирга Ўзбекистон Республикаси Президенти ҳузуридаги Оролбўйи халқаро инновация марказининг Мўйноқ филиалида мактаб ўқувчилари учун ёш биологлар тажриба участкасини ташкил этишга ва ушбу ер майдонида ўқувчиларга бошланғич амалий экологик таълим беришни йўлга қўйишга келишилди.

Мактаб маъмурияти Оролбўйи халқаро инновация маркази ва мактаб жамоаси ўртасидаги ҳамкорлик ёшларни илм-фанга қизиқишларини ошишига, ҳудуднинг экологик ҳолатини ижобий томонга ўзгартириш учун замонавий технологиялар, янги билимлардан фойдаланиш муҳим аҳамиятга эга эканлигини тушунишларига хизмат қилади. Бу ўз навбатида келажакда уларнинг инновацион лойиҳалар, ишланмалар, технологиялар орқали аҳолининг фаровон ҳаёт кечириши учун зарур шароитлар яратишларига асос бўлади.

Манба: Ўзбекистон Республикаси Инновацион ривожланиш агентлиги