Мазкур клубнинг илк йиғилишида АКТ соҳасида илмий тадқиқот изланишларини олиб бораётган докторантлар, тадқиқотчилар, магистрлар, ёш педагог ўқитувчилар ҳамда соҳанинг малакали амалиётчилари иштирок этди.

 

Республика ёш олимлар кенгаши модераторлари Илмий мунозаралар клубининг фаолияти, истиқболи ва таҳлил учун белгиланадиган мавзулар тўғрисида иштирокчиларга атрофлича маълумот берди. Ушбу клуб илмий-тадқиқот изланишларини олиб боришнинг босқичлари ҳақида маълумотлар бериш, долзарб, ижтимоий аҳамиятга молик тадқиқотлар мавзусини танлашга кўмаклашиш, ёш тадқиқотчиларга илмий мушоҳада, илмий фараз, прогноз, қиёсий, таҳлилий хулосалар чиқариш кўникмаларини ўргатиш, тадқиқот олиб бориш тартиблари, тадқиқотчиларнинг илмий маърузаларини етакчи халқаро журнал ва нашрларга тавсия этиш, қўллаб-қувватлашда амалий ёрдам кўрсатиш каби вазифаларни бажариши таъкидлаб ўтилди.

 

Йиғилишда Тошкент ахборот технологиялари университетининг ёш тадқиқотчилари мавзуга доир илмий маърузалар билан иштирок этди. 

 

“Республика ёш олимлар кенгаши” нодавлат нотижорат ташкилоти ва Тошкент ахборот технологиялари университети ўртасида ҳамкорлик меморандуми имзоланди.