2019 йилнинг 26 февраль куни Тошкент шаҳрида Ўзбекистон ва Испания ташқи сиёсат идоралари ўртасидаги сиёсий маслаҳатлашувларнинг олтинчи раунди бўлиб ўтди.

Делегацияларга Ўзбекистон Республикаси Ташқи ишлар вазири ўринбосари Дилшод Ахатов ва Испания Қироллиги Ташқи ишлар, Европа Иттифоқи ва ҳамкорлик вазирлиги давлат котиби Фернандо Валенсуэла Марзо раҳбарлик қилдилар.

Мамлакатларимиз ўртасидаги ҳамкорликни янада мустаҳкамлаш бўйича аниқ чоралар муҳокама қилинди, халқаро ва минтақавий муаммолар юзасидан фикр алмашилди.

Учрашувда таъкидланганидек, Ўзбекистон Президенти Шавкат Мирзиёев ва Испания Қироли Филлип VI ўртасида 2017 йил 9 июнь куни Остонада бўлиб ўтган учрашув Ўзбекистон-Испания ҳамкорлигига муҳим фаоллик бағишлади. Давлат раҳбарлари ўртасида ўрнатилган конструктив ва ишончли мулоқот ўзаро манфаатли алоқаларни янада ривожлантириш учун янги истиқболларни очади.

Испания компанияларининг иқтисодиётнинг турли соҳаларида, жумладан, қишлоқ хўжалиги, электротехника, кимё, қурилиш ва фармацевтика, машина қурилиши, тўқимачилик ва озиқ-овқат саноати, туризм каби соҳаларда юқори технологияли ишлаб чиқариш қувватларини Ўзбекистонда яратиш лойиҳаларида иштирок этишдан манфаатдор эканликларини тасдиқланди. Иқтисодиёт ва саноат соҳасида ҳамкорлик бўйича Ҳукуматлараро комиссиянинг биринчи мажлисини 2019 йилда ўтказиш ҳамкорликни кенгайтириш, ҳукумат даражасида икки мамлакат ишбилармонлари ўртасидаги тўғридан-тўғри алоқаларни қўллаб-қувватлаш имконини беради.

Испаниянинг Европа Иттифоқидаги фаол ролини инобатга олган ҳолда икки томонлама муносабатларда “Ўзбекистон-ЕИ” шаклидаги ҳамкорлик муҳим ўрин тутади. Испания томони Ўзбекистон ва Европа Иттифоқи ўртасида Кенгайтирилган шериклик ва ҳамкорлик тўғрисидаги янги Битим бўйича музокаралар бошланишини, шунингдек, мамлакатимизнинг Жаҳон савдо ташкилотига аъзо бўлишини қўллаб-қувватлади. Таъкидлангандек, ушбу мавзулар бугун Испания делегацияси томонидан Ўзбекистон вазирлик ва идораларидаги музокаралар чоғида муҳокама қилинади.

Учрашувда умумий кун тартибидаги бошқа масалалар ҳам кўриб чиқилди.

Маслаҳатлашувлар якунида икки давлат ташқи сиёсат идоралари ўртасида 2019-2020 йилларга мўлжалланган Ҳамкорлик дастури имзоланди.

Манба: Ўзбекистон Республикаси Ташқи ишлар вазирлиги