Тошкент шаҳар ҳокими Жаҳонгир Артикхўжаев Покистон Ислом Республикасининг Фавқулодда ва мухтор элчиси Юсуф Шами билан учрашув ўтказди.

Учрашувда Ўзбекистон ва Покистон алоқаларининг кўлами сўнгги икки йилда янги босқичга кўтарилгани қайд этилди. Музокараларда Покистон сармоядорлари иштирокида инвестицион лойиҳаларни амалга ошириш, бу борада бажарилиши лозим бўлган ишлар муҳокама этилди.

Хусусан, ҳамкорликда мактабгача таълим муассасаларини барпо этиш, уларда инновацион таълим тизимини жорий этиш кўзда тутилган. Шунингдек, Тошкент ва Исломобод шаҳарлари ўртасида авиарейсларни қайта тиклаш, юк ташиш ва иккала мамлакат пойтахтлари ўртасида ҳамкорлик шартномаларини имзолаш бўйича ҳам ўзаро фикр алмашилди.

Манба: Тошкент шаҳар ҳокимлиги