Халқ таълими вазирлиги ўқувчи-ёшлар билан ишлашга қаратилган “Вазирлик ва ўқувчи-ёшлар” янги ташаббусни амалга оширишни бошлади.

Лойиҳанинг асосий мақсади Ўқувчи-ёшларнинг бугунги кундаги таълим сифати тўғрисидаги фикр-мулоҳазаларини ўрганиш, ўқувчи-ёшларнинг таълимга жалб қилишда тенгдош-тенгдошга тамойилига мувофиқ ижтимоий фаолликни такомиллаштириш бўйича лойиҳалар ва таклифларни эшитиш ҳамда уларни ҳаётга татбиқ этиш ва Халқ таълими вазирлиги тизимида амалга оширилаётган лойиҳаларда ўқувчи-ёшларни иштирокини таъминлашдир.

Мазкур лойиҳа 16-17 ноябрь кунлари Тошкент шаҳрида илк бор ўтказилади ва у Халқ таълими вазирлиги, ёшлар билан ишловчи вазирликлар ва идоралар вакиллари ҳамда Ўзбекистоннинг барча ҳудудларидан келган 70 нафар ёшларни бирлаштиради.

Ташаббус доирасида ўқувчи-ёшлар пойтахтимиздаги бир неча таълим ва маданий объектларга ташриф буюрадилар.

Шу билан бирга улар Халқ таълими вазирлиги раҳбарияти билан учрашадилар ва вазирликнинг ўқувчи-ёшлар ҳамда ёшлар ташкилоти билан ишлашга қаратилган лойиҳа ва ташаббусларни муҳокама этадилар.

Учрашув натижасига кўра, Халқ таълими вазирлиги ўқувчи-ёшлар билан ишлаш бўйича “йўл харитаси” қабул қилинади ва уни амалга оширишда мактаблардаги ёшлар сардорлари бевосита иштирок этадилар.

Таъкидлаш лозимки, ҳозирги кунда Ўзбекистон Халқ таълими вазирлиги тизимида 9,63 мингга яқин мактаблар фаолият юритмоқда ва уларда 5,8 млн. нафардан зиёд ёшлар таълим олмоқдалар.

Манба: Ўзбекистон Республикаси Мактабгача ва мактаб таълими вазирлиги