2018 йилнинг 22 октябрь куни Ўзбекистон Республикаси Ташқи ишлар вазири Абдулазиз Камилов куни кеча мамлакатимизга амалий ташриф билан келган Қатар Давлати Ташқи ишлар давлат вазири Султон бин Саад ал-Мурейхий бошчилигидаги делегацияни қабул қилди.

Учрашувда икки томонлама муносабатларнинг ҳозирги ҳолати ва истиқболлари муҳокама қилинди.

Ўзбекистон – Қатар мулоқотини оширишга, аввало савдо-иқтисодий ва инвестицион соҳалардаги муносабатларни жадаллаштиришга томонларда ўзаро қизиқиш мавжудлиги этироф этилди. Ўзаро товар айланмаси муттасил ўсаётганига қарамасдан, таъкидланганидек, унинг ҳажмлари томонларда сезиларли салоҳият борлигидан гувоҳлик беради. Шу нуқтайи назардан ташкил этилган Савдо-иқтисодий ҳамкорлик бўйича қўшма ҳукуматлараро комиссиянинг бу борада муҳим роль ўйнаши кутилмоқда. Мазкур комиссиянинг биринчи мажлисини 2019-йилнинг бошида ўтказиш режалаштирилган.

Маданий-гуманитар, туризм ва бошқа соҳалардаги алоқаларни ривожлантириш масалалари батафсил муҳокама қилинди.

Суҳбат чоғида долзарб минтақавий ва халқаро масалалар, Афғонистондаги вазиятни тинч йўл билан бартараф этиш жараёнлари юзасидан фикр алмашилди.

Шу куннинг ўзида Ўзбекистон – Қатар сиёсий маслаҳатлашувларининг иккинчи раунди бўлиб ўтди.

Манба: Ўзбекистон Республикаси Ташқи ишлар вазирлиги