2018 йил 18 октябрь куни “lnfolib Uzbekistan​” VII Миллий ахборот-кутубхона ҳафталиги доирасида "Моддий-маданий мерос объектларининг ўзаро интеграцияси" мавзусида давра суҳбати бўлиб ўтди. Унда ахборот-кутубхона, ахборот-ресурс марказларининг нодир фондлари билан ишловчи мутахассислар музей, архивлар ходимлари ва кутубхона фойдаланувчилари иштирок этдилар.

Ўзбекистон Миллий кутубхонаси Қўлёзмалар, нодир ва алоҳида қимматга эга нашрлар хизмати раҳбари Н.Зоитова давра суҳбати иштирокчиларини қутлади ва тадбирнинг долзарблиги жиҳатларини айтиб ўтди. “Мазкур давра суҳбатининг мақсади - моддий-маданий мерос объектларида фаолият олиб бораётган мутахассисларнинг касбий малакаларини ошириш, соҳада рўй бераётган ўзгаришлар ва янгиликларни ўзлаштириш ва осонлаштириш мақсадида улар ўртасида ҳамкорликни йўлга қўйиш, норматив тартибларни муҳокама қилиш, консервация, реставрация ва каталоглаш масалаларининг сифатини яхшилаш”.

Ўзбекистон давлат тарихи музейи директори Ж.Исмаилова моддий-маданий мерос объектларининг ўзаро интеграцияси борасида қуйидагиларни таъкидлади: "Маданий мерос ва маданий қадриятларга бўлган ҳуқуқий меъёрлар ва меъёрларга қатъий риоя қилиш, биринчи навбатда, маданий мероснинг барча ҳажмини сақлаб қолиш учун шарт-шароитларни яратишни назарда тутади".

Ўзбекистон Республикаси Вазирлар Маҳкамаси ҳузуридаги “Ўзархив” агентлиги Бош директори ўринбосари Д.Кучарова моддий-маданий мерос объектларининг ўзаро интеграцияси заруратини ва унинг туризмни ривожлантиришдаги ролини эътироф этди. "Музейлар, кутубхоналар, архивлар, маданий ва тарихий меросни асраб-авайлайди, улар маданий ва маърифий сайёҳликни ривожлантиришга, шу жумладан интерактив дастурларнинг тўпламини ривожлантиришга ёрдам берадиган ҳудудларни, шу жумладан ички ва ташқи туризм бозорларида реклама қилишда етакчи роль ўйнайди".

Давра суҳбати доирасида моддий-маданий мерос объектларида олиб борилаётган ишларни ягона стандартлар асосида ташкил этиш, моддий-маданий мерос объектларида олиб борилаётган ишлар ва эришилган ютуқлар, уларни тарғиб қилиш ва соҳа мутахассислари билан ўртоқлашиш механизмлари, ЮНEСКО "Жаҳон хотираси" дастурининг минтақавий ва халқаро даражасига меросий ҳужжатни тақдим этиш тартиб ва талаблари, моддий-маданий мерос объектлари фондларини консервация ва реставрация қилиш асослари каби мавзулар муҳокама қилинди.

Манба: Ўзбекистон Республикаси "Ўзархив" Агентлиги